چوار پارکی گەورە لە هەولێر دروست دەکرێن

ئاڤا نیوز

 

پارێزگای هەولێر ئاشکرای کرد کە لە چواچێوەی گرنگیدان بە ژینگە چوار پارک لە سنووری پارێزگای هەولێر دروست دەکەن.

 

وێنە گەورەكە: كابینەی نۆیەمی حكومەتی هەرێمی كوردستان بەردەوامە لە جێبەجێكردنی پڕۆژە خزمەتگوزارییەكان لە شار و شارۆچكەكانی هەرێمی كوردستان، یەكێک لە بەرنامەكانی كابینەكە گرنگیدانە بە کەرتی ژینگە، لەو چوارچێوەیەدا لەماوەی چەند ساڵی ڕابردوودا چەندین پارک دروست كراون.

 

ڕاگەیێنراوی فەرمی: پارێزگای هەولێر لە ڕاگەیێنراوێكدا ئاشكرای كرد كە لە چوار پڕۆژەی جیادا بە گوژمەی زیاتر لە 23 ملیار دینار چوار پاركی گەورە دروست دەكرێن.

 

زانیاریی زیاتر: پڕۆژەكان بریتین لە پاركێک لەکەنار شەقامى خێراى 150 مەتری بە گوژمەى 3 ملیار و 700 ملیۆن دینار، لەسەر بودجەی نووسینگەی سەرۆكوەزیران بارزانی و لەسەر ڕووبەری 150ھەزار مەتری چوارگۆشە، هەروەها سەوزکردنی یەکتربڕی شەقامی 120 مەتری لە ڕێگەی هەولێر - موسڵ، بە گوژمەی زیاتر لە 3 ملیار و 420 ملیۆن دینار لەسەر ڕووبەری 205 هەزار مەتر.

 

ئەوەش بزانە: دوو پڕۆژەی تریش جێبەجێ دەکرێن لەوانە، پارکى ڕەشکین، بە گوژمەی 15 ملیار دینار، لەسەر بودجەی تایبەتی نووسینگەى سەرۆكوەزیران بارزانی و لەسەر ڕووبەری نزیکەی 120 هەزار مەتر دووجا، هەروەها پارکی گەڕەکى ژیان بە گوژمەى 1 ملیار و 40 ملیۆن و 477 هەزار دینار، لەسەر بودجەى 15% ى  شارەوانى هەولێر لەسەر ڕووبەری 19 هەزار مەتر دووجا.

 

ئەوەی پێویستە بیزانیت: پارێزگای هەولێر ئاماژەی بەوەشداوە كە هەر چوار پڕۆژەكە دەست بە دروستكردنیان كراوە.