لە مەهاباد فێستیڤاڵێک بۆ فیلم و سیناریۆ و وێنە ڕێکدەخرێت

ئاڤا نیوز

 

فێستیڤاڵی ئاسمان بە ئامانجی ناساندنی توانا نێوخۆیی و ناوچەییەکان، لە هەر سێ بەشی فیلم، سیناریۆ و  وێنە لە 8 تاوەکو 11ـی ئەم مانگە لە شاری مەهابادی ڕۆژهەڵاتی کوردستان ڕێکدەخرێت.

 

وێنەگەورەکە: ئەم فێستیڤاڵە یەکەمجارە لە شاری مەهابادی  ڕۆژهەڵاتی کوردستان ڕێکدەخرێت،  هونەرمەندان و فۆتۆگرافەرانی 11 پارێزگای ڕۆژهەڵاتی کوردستان و ئێران هەزار و 380 بەرهەمیان ناردوون و لەو ژمارەیە 173 بەرهەم هەڵبژێردراون.

 

لێدوانی فەرمی: ئیبراهیم سەعیدی، بەڕێوەبەری فێستیڤاڵەکە بە ئاژانسی سەدا و سیمای وڵاتەکەی ڕاگەیاند: بۆ بەشی سیناریۆی فێستیڤاڵ 280 بەرهەم ڕەوانەی سکرتاریەتی فێستیڤاڵ کراون، دەستەی دادوەری 46 بەرهەمی بۆ بەشداریکردن لە کێبڕکێ هەڵبژاردووە، بۆ بەشی فیلمیش 300 بەرهەم بۆ فێستیڤاڵ نێردراون و دەستەی دادوەری 60 کورتەفیلمی لە چوار بواری داستانی، بەڵگەنامەیی، ئەنیمەیشن و ئەزموونی هەڵبژاردووە.

 

زانیاریی زیاتر: لە بەشی وێنەدا 800 بەرهەم لەلایەن 166 فۆتۆگرافەر ڕەوانەی فێستیڤاڵ کراون و لیژنەی دادوەری 67 بەرهەمی 42 فۆتۆگرافەری بۆ بەشی کێبڕکێی فێستیڤاڵەکە هەڵبژاردووە.