عێراق و ئەمریکا لەسەر کشانەوەی هێزەکانی هاوپەیمانان دەگەنە ڕێککەوتن

ئاڤا نیوز

 

بەرپرسێکی ئەمریکا لە لێدوانێکی بۆ ئاژانسی ڕۆیتەرز ئاشکرایکرد، حکومەتی عێراق و ئەمریکا گەیشتوونەتە ڕێککەوتن بۆ کشانەوەی هێزەکانی هاوپەیمانی دژی داعش لە عێراق. 

 

وێنە گەورەکە: دوای هاتنی داعش و داگیرکردنی چەند ناوچەیەکی خاکی عێراق، ئەمریکا سەرکردایەتی هاوپەیمانییەتی نێودەوڵەتی کرد بۆ کۆتاییهێنان بە مەترسییەکانی داعش لە عێراق و سووریا، دوای کوشتنی قاسم سلێمانی، فه‌رمانده‌ی فه‌یله‌قی قودسی سوپای پاسدارانی ئێران، و  ئەبو مەهدی موهەندیس، سەرۆک ئەرکانی حەشدی شەعبی لە ساڵی 2021، پەرلەمانی عێراق بەبێ کورد و سووننە دەنگی لەسەر پڕۆژە یاسای دەرکردنی ئەو هێزانە دا. 

 

زانیاریی بەدەستهاتوو: ئاژانسی ڕۆیتەرز لەسەر زاری بەرپرسێکی باڵای ئەمریکا دەڵێت: ڕێککەوتنێک هەیە لەبارەی کشانەوەی هێزەکانی هاوپەیمانان، بەڵام وادەی ڕاگەیاندنی دیاریی نەکراوە و پلان وایە سەدان سەربازی هاوپەیمانان لە مانگی ئەیلوولی 2025 خاکی عێراق جێبهێڵن و بەشێکیشی دەمێننەوە تاوەکو ساڵی 2026.

 

ئەوەی پێویستە بیزانیت: لەسەرەتای ئەمساڵەوە لیژنەیەکی باڵای هاوبەشی سەربازیی لە نێوان عێراق و هاوپەیمانیی نێودەوڵەتی دژ بە داعش بە سەرۆکایەتیی ئەمریکا بۆ پێداچوونەوە بە ئەرکی سەربازیی هاوپەیمانان پێکهێنراوە و لە چەند مانگی ڕابردوودا چەندین کۆبوونەوەیان کردووە.

 

باکگراوند: ئەمریکا لە عێراق 2500 سەربازی هەیە و لەسەر داوای حکومەتی عێراق هاتوون، بۆ ڕاوێژ و هاوکاریکردنی سوپای عێراق و پێشمەرگە بۆ ڕووبەڕووبوونەوەی داعش.