لە کرماشان سەدان هێکتار زەوی بەهۆی ماددەی هۆشبەرەوە دەسووتێت

ئاڤا نیوز

لە شاری کرماشانی ڕۆژهەڵاتی کوردستان سەدان هێکتار زەوی دەسووتێت، بەهۆی چاندنی ڕووەکێک کە ماددەی هۆشبەری لێ بەرهەم دەهێنرێت، چەند کەسێکیش بەگومانی هەبوونی دەست لە ئاگرکەوتنەوەکە دەستگیردەکرێن .

لێدوانی فەرمی: ئینشائەڵڵا کۆلانی، بەڕێوەبەری گشتیی سامانە سرووشتییەکان و سەرچاوەکانی ئاوی پارێزگای کرماشان بە ئاژانسی فەرمی وڵاتەکەی ڕایگەیاند: "شەوی ڕابردوو ئاگر لە دارستانەکانی قەزای سەرفەیرۆز ئاباد کەوتووەتەوە و توانراوە کۆنترۆڵ بکرێت، هەرچەندە ئەگەری هەڵگیرسانەوەی لەئارادایە".

هۆکارە زانراوەکان: بەگوتەی ئینشائەڵڵا کۆلانی، خەڵکانی لەیاسادەرچوو هۆکارن بۆ ئاگرکەوتنەوەکە، خەڵکی ناوچەکەش بەهەمانشێوە دان بەوەدا دەنێن ئاگرەکە لەلایەن چەند کەسێکی ناوچەکەوە بەئەنقەست کراوەتەوە و مەبەست لێی ئامادەکردنی زەوییەکان بووە بۆ چاندنی ڕووەکی خەشخاش، کە ماددەی هۆشبەری لێ بەرهەم دەهێنرێت".

لەلایەکی دیکەوە: ئەفشین یەگانە، بەڕێوەبەری گشتیی فەرمانگەی بەڕێوەبردنی قەیرانەکانی پارێزگای کرماشان دەڵێت: "تا ئێستا بەگشتی دوو هەزار و 580 هێکتار لەوەڕگە و دارستانی ئەم ناوچەیە سووتاون".

زانیاریی زیاتر: قەبارەی زەوییە نیشتمانییەکانی کرماشان 306 هەزار هێکتارە، 100 هەزار هێکتاریان دارستانە و بەشێکی زۆری دەکەوێتە قەزای سەرفەیرۆز ئاباد .