سێ بەرپرسی پێشووی یەکێتی ئۆتۆمبێلەکانیان ڕادەست دەکەنەوە

ئاڤا نیوز

 

 

 

دوای گوشارەکانی سەریان، سێ سەركردەی دێرینی یەكێتی كە دووانیان پێشووتر ئەندامی مەكتەبی سیاسی بوون، شەش ئۆتۆمبێل ڕادەستی حیزبەكە دەكەنەوە.

 

وێنە گەورەكە: ئێوارەی ڕۆژی 5-9-2024، هێزێکی کۆماندۆی یەکێتی دەستی بەسەر باڵەخانەی دەزگای چاودێر لە گردی ئەندازیارانی شاری سلێمانیدا گرت، کە بارەگای هەریەکە لە ڕادیۆی مەدەنیەت، پلاتفۆرمی دابڕان، بنکەی گەلاوێژ، ماڵپەڕی گەلاوێژ، ماڵپەڕی چاودێر، ماڵپەڕی ڕوانگە و ڕەخنە، پڕۆژەی پەیکەرسازیی چاودێر، گەلەری چاودێر، هۆڵی کۆنفراسی "شەهید ئازاد هەورامی" و کتێبخانەیەک، بوو. ئەمەش کاردانەی زۆری بەدوای خۆیدا هێنا.

 

زانیاریی بەدەستهاتوو: دوای ڕووداوەكە ژمارەیەك لە سەركردە دێرینەكانی یەكێتی سەردانی مەلا بەختیاریان كرد و پشتیوانیی خۆیان بۆ ڕاگەیاند، لەبەرامبەردا لە ئاستی باڵا یەكێتی گوشارەكانی لەسەر ئەو سەركردانە زیاد كرد و هەڕەشەی وەرگرتنەوەی ئۆتۆمبێل و خانوو و موڵكی دیكەیان لێكرا.

 

زانیاریی تایبەت: ئەمڕۆ هەریەك لە فەرەیدوون عەبدولقادر و سالار عەزیز و مامۆستا جەعفەر ئەندامانی پێشووتری مەكتەبی سیاسیی یەكێتی ئۆتۆمبێلەكانیان ڕادەستی ئیدارەی گشتیی یەكێتی كردووەتەوە، ئەمەش وەك كاردانەوەیەك لەبەرامبەر گوشارەكانی چەند ڕۆژی ڕابردوو.

 

لێدوانی فەرمی: فەرەیدوون عەبدولقادر، ئەندامی پێشووتری مەكتەبی سیاسیی یەكێتی بە ئاڤا نیوزی ڕاگەیاند: من ئۆتۆمبێلێكی مۆدێل 2015ـی یەكێتیم لابوو و ڕادەستی یەكێتیم كردەوە.

 

لەلایەكی دیكەوە: سالار عەزیز سێ ئۆتۆمبێل و مامۆستا جەعفەر دوو ئۆتۆمبێلیان ڕادەستی ئیدارەی گشتیی یەكێتی كردووەتەوە.