لە دوو چالاکی جیاوازدا سێ بازرگانی ماددەی هۆشبەر دەستگیر دەکرێن

ئاڤا نیوز

 

بازرگانێکی مەترسیدار لە دەرەوەی وڵات و دوو بازرگانی دیکە لە ناوخۆ دەستگیرکران. هەروەها بری 10 کیلۆگرام  ماددەی کریستاڵ دەستی بەسەرداگیرا.

ڕاگەیێنراوی فەرمی: بەڕێوەبەرایەتی نەهێشتنی ماددە هۆشبەرەکان ڕایگەیاند: دوو بازرگانی ماددەی هۆشبەر بە 10 کیلۆگرام ماددەی هۆشبەری جۆری کریستاڵەوە لە 5-9-2024 لە شاری هەولێر و سلێمانی دەستگیرکران.

 

ئەوەی پێویستە بیزانیت: لە ڕاگەیەیێنراوەکەدا هاتووە: دواتر شوێنی بازرگانە سەرەکییەکە، کە لە وڵاتی لوبنان نیشتەجێ بووە، دەستنیشانکراوە و دوای هاوئاهەنگی لەگەڵ بەڕێوەبەرایەتی نەهێشتنی ماددە هۆشبەرەکانی حکومەتی عێراقی فیدڕاڵ و ناردنی فەرمانی دەستگیرکردنی تاوانبارەکە، هێزە ئەمنییەکانی وەزارەتی ناوخۆی لوبنان توانییان لە 6-9-2024 ئەو بازرگانە مەترسیدارە دەستگیر بکەن، کە چەندین پێشینەی تاوان و فەرمانی دەستگیرکردنی هەبووە.

 

زانیاریی زیاتر: ئەم بازرگانە بە ڕەچەڵەک کوردە و سەرچاوەی دابینکردنی بەشی زۆری ئەم ماددە هۆشبەرانە بووە، کە لە هەرێمی کوردستان و بەشێک لەپارێزگاکانی دیکەی عێراق بڵاودەکرایەوە و ژمارەیەکی بەرچاو لەو بازرگانانەی لە هەرێم دەستگیراون و دراونەتە دادگە کە لەم کەسەوە فێری ئەم بازرگانییە بوونە.