حەوت دەروازەی سنووری هەرێمی کوردستان چاوەڕوانی ڕەزامەندی بەغدان

ئاڤا نیوز

 

بەڕێوەبەری پێشووی دەروازە سنوورییەکان ڕایگەیاند، لایەنی عێراقی بۆ گۆڕینی ئاراستەی کۆبوونەوەکان، هەموو جارێک بیانووی قاچاخچێتی لە دەروازەکانی باشماخ و پەروێزخان بەبێ بوونی بەڵگە دە‌هێنە بەر باس.

 

زانیاری بەدەستهاتوو: هەرێمی کوردستان چەند مەرزێکی نێودەوڵەتی هەیە لەوانە، باشماخ، حاجی ئۆمەران، ئیبراهیم خەلیل، پەروێزخان، بەگوێرەی داتاکانی بەڕێوەبەرایەتی گشتیی گومرگ، داهاتی گومرگی ئیبراهیم خەلیل نزیکەی 50%ی کۆی گشتی داهاتی دەروازەکانی دیکەیە. 

 

زانیاری تایبەت: هەرێمی کوردستان حەوت دەروازەی ئاڵوگۆڕی بازرگانی هەیە، بەڵام لەلایەن حکومەتی عێراقەوە ڕەزانەندیان پێنەدراوە، ئەوانیش دەروازەکانی سەرتەک، کێلێ، سەرزێڕ، تەوێڵە، فیشخابوور، سەیرانبەن.

 

زانیاری زیاتر: بەگوێرەی یاسای ژمارە 30 ی ساڵی 2016، حکومەتی عێراق دەیەوێت ئیدارەی دەروازە سنووریەکان هاوبەش بێت، بەڵام هەرێمی کوردستان داوای هەموارکردنەوەی یاساکە دەکات، پێیوایە یاساکە بەشێوازی تاکلایەنانە نووسراوەتەوە. 

لێدوانی فەرمی: ساماڵ عەبدولڕەحمان، بە ئاڤا نیوزی گوت: تا ئێستا میکانیزمێک بۆ ئیدارەدانی هاوبەشی دەروازەکان نەدۆزراوەتەوە.

 

لەلایەکی دیکەوە: بابەتی قاچاخچێتی باشماخ و پەروێزخان کە لایەنی عێراقی تێبینیان لەسەر هەبووە، بەگوتەی ساماڵ عەبدولڕەحمان بۆ گۆڕینی ئاراستەی کۆبوونەوەکان بووە، نەیوانتوانیوە هیچ بەڵگەیەک لەو ڕووەوە بخەنە ڕوو، دەڵێت: ‘ئێمەش تێبینیمان لەسەر دەروازەکانی ئەوان هەیە’.