کۆبوونەوەیەکی دیکەی تایبەت بە ڕێگای گەشەپێدان دەکرێت

ئاڤا نیوز 

 

لە چوارچێوەی ئامادەکارییەکان بۆ دەستپێکردنی پڕۆژەی ڕێگای گەشەپێدان، کۆتایی ئەمساڵ لیژنەکانی هەماهەنگی کە لایەنی هونەریی و جێبەجێکاریی پڕۆژەکەن لە عێراق، کۆبوونەوەیەکی دیکە دەکەن.

 

وێنە گەورەکە: ڕێگەى گەشەپێدان، پڕۆژەیەکی ئابووری، بازرگانی و گواستنەوەی نێودەوڵەتییە، وڵاتانی کەنداو بە تورکیا و پاشان بە ئەوروپا دەبەستێتەوە. لە بەندەری فاوەوە دەستپێدەکات، بە سنووری 11 پارێزگا تێدەپەڕێت و لە فێشخابوور کۆتایی دێت. درێژییەکەى 1200 کیلۆمەترە و تێچووەکەی 17 ملیار دۆلار دەبێت، بڕیاریشە قۆناغی یەکەمی پڕۆژەکە ساڵی 2028 تەواو ببێت.

 

ڕاگەیێنراوی فەرمی: وەزارەتی گواستنەوەی عێراق لە ڕاگەیێنراوێکدا ئەوەی خستووەتەڕوو، لیژنەی هەماهەنگی عێراق تایبەت بە ڕێگای گەشەپێدان کۆبوونەوەی خۆی ئەنجامداوە و تیایدا جەختکرایەوە کە تا سەرەتای ساڵی نوێ، هەموو ئاستەنگییەکان لاببرێن و بە نوێترین تەکنەلۆژیای سەردەم دەست بە پڕۆژەکە بکرێت.
 
بۆچی گرنگە: کۆبوونەوەکە لە چوارچێوەی بەردەوامی هەوڵەکانی بەغدایە بۆ جێبەجێکردنی پڕۆژەی ڕێگای گەشەپێدان، کە دەبێتە ڕێڕەوێکی دیاری بازرگانیی و عێراق باوەڕی وایە دەشبێتە ڕێگایەکی گرنگی گواستنەوەی کاڵا لەنێوان ئاسیا و ئەوروپا لەڕێگەی تورکیاوە.