پرۆسەی دامەزراندنی سێ یەکەمەکانی زانکۆ و پەیمانگەکان هەنگاوێک دەبڕێت

ئاڤا نیوز

سێ یەکەمەکانی زانکۆ و پەیمانگەکانی هەرێمی کوردستان پرۆسەی بایۆمەترییان تەواو کرد، دوای وردبینیکردن لە زانیارییەکانیان لەلایەن وەزارەتی دارایی و ئابووری، لیستی ناوەکانیان ڕەوانەی وەزارەتی دارایی عێراق دەکرێت.

وێنە گەورەکە: مانگی ڕابردوو ناوی 13 هەزار قوتابی کە سێ یەکەمی شەش ساڵی خوێندنن، لە زانکۆ و پەیمانگەکان ئاراستەی وەزارەتی خوێندنی باڵا کرا، دوای پڕۆسەی بایۆمەتری ناوی 10 هەزار کەس ماوەتەوە.

لێدوانی فەرمی: د. توانا نەجەف، بەڕێوەبەری گشتیی دیوان لە وەزارەتی خوێندنی باڵا بە ئاڤا نیوزی گوت، "لە پڕۆسەی بایۆمەتری دەرکەوتووە سێ هەزار لە سێ یەکەمەکان لە کەرتەکانی دیکە دامەزراون، یان چوونەتە دەرەوەی وڵات یان لە ژیاندا نەماون."

زانیاریی زیاتر: دوای وردبینی، لیستی ناوەکان ئاراستەی وەزارەتی دارایی عێراق دەکرێت، ئەوانیش دووبارە وردبینی لە لیستەکە دەکەن و ئینجا بڕیاری دامەزراندنیان دەدرێت. 

باکگراوند: لە ساڵی 2018 ەوە پرۆسەی دامەزراندنی سێ یەکەمەکانی زانکۆ و پەیمانگەکان وەستاوە، ئەوکات هەزار و 300 دەرچووی ساڵی خوێندنی 2016-2017 دامەزرێنران، ئەمساڵیش بە بڕیاری سەرۆکوەزیران بارزانی دامەزراندن دەستپێکردووەتەوە و سێ یەکەمەکانی ساڵانی 2017-2018 تاوەکو 2022-2023 دادەمەزرێنرێن.