وەزیری خوێندنی باڵا: ئاستی زانكۆكان لە كابینەی نۆیەمدا گەشەی باشی تۆماركردووە

ئاڤا نیوز

 

وەزیری خوێندنی باڵای حكومەتی هەرێمی كوردستان ڕایگەیاند، ئاستی زانستیی زانكۆكان لە كابینەی نۆیەمدا گەشەی باشی تۆماركردووە، دەشڵێت "وەزارەتی خوێندنی باڵا قورسایی ناخاتە سەر دۆخی ئابووری قوتابیانی پاراڵێڵ و تا ئێستا قیستی خوێندنی ساڵی خوێندنی 2023بۆ 2024 وەرنەگیراوە".

لێدوانی فەرمی: د. ئارام محەممەد، وەزیری خوێندنی باڵا و توێژینەوەی زانستیی حكومەتی هەرێمی كوردستان، بە ئاڤا نیوزی راگەیاند: لە چوار ساڵی ڕابردوو سەرەڕای قەیرانی دارایی و دواكەوتنی موچە زانكۆكانی كوردستان ئاستێكی زانستی بەرزیان تۆماركردووە، چەندین توێژینەوەی ئاست بەرزیان پێشكەشكردووە، ئێستا كێبڕكێی زانكۆ ناودارەكانی جیهان دەكات و زیاتر لە 50 پڕۆفیسۆر نازناوی زانایان لە جیهاندا پێدراوە.

" زانكۆی سلێمانی 186 پرۆفیسۆری هەیە هەندێكیان پلەی زانایان پێدراوە و هەندێكیان ناویان لە لیستی باشترین مامۆستاكانی جیهانە و ئەمانە هۆكارن بۆ یەكەمبوونی زانكۆی سلێمانی لەسەر ئاستی هەرێم و سێیەم لەسەر ئاستی عێراقدا".

د. ئارام محەمەد لەبارەی وەرنەگرتنی كرێی پاراڵێڵی ئەمساڵی خوێندنەوە گوتی: وەزارەتی خوێندنی باڵا قورسایی ناخاتە سەر دۆخی ئابووری قوتابیانی پاراڵێڵ و تا ئێستا قیستی خوێندنی ساڵی خوێندنی 2023بۆ 2024 وەرنەگیراوە.

ئەوەی پێویستە بیزانیت: نزیكەی پێنج مانگە ساڵی خوێندنی 2023 بۆ 2024 دەستیپێكردووە و وەزارەتی خوێندنی باڵا هیچ قیستێكی خوێندنی پاراڵێڵی لە زانكۆو پەیمانگاكانی هەرێمی كوردستان وەرنەگرتووە بەهۆی دواكەوتنی موچە وەك هاوكارییەك بۆ قوتابییان.