لە هەولێر تەمێكی چڕە و سەرجەم گەشتە ئاسمانییەکان ڕاگیران

ئاڤا نیوز

بەهۆی دروستبوونی تەمومژ ژمارەیەک گەشتیی ئاسمانی کە لە هەولێرەوە دەڕۆیشتن و بەشێکی دیکەشیان بەرەو هەولێر دەهاتن بۆ دوای ئاسایبوونەوەی دۆخی کەشوهەوا دواخران. 

چیرۆکی سەرەکی: لە ئێوارەی ئەمڕۆوە تەمێکی چڕ شاری هەولێر دروستبووە، بەهۆیەوە ئاستی بینین بۆ کەمتر لە یەک کیلۆمەتر دابەزیوە، ئەمەش کاریگەریی دروستکردووە لەسەر هاتووچۆی شۆفێران و گەشتی فڕۆکەکان. 

لێدوانی فەرمی: لاوەند مەموندی، بەڕێوەبەری کۆمپانیای فلای ئەربیل بە ئاڤا میدیای ڕایگەیاند: دوو فڕۆکە کە لە ئەڵمانیاوە هاتوون بەهۆی دروستبوونی تەم لە هەولێر ناتوانن بنیشنەوە. 

- ئێستا ئاسمانی هەولێر زۆر تەمومژە بەهۆیەوە ئەو دوو فڕۆکەیە لەوانەیە لە فڕۆکەخانەی سلێمانی یاخود بەغدا بنیشنەوە. 

- ئێستا ئەو دوو فڕۆکەیەمان گەیشتوونەتە ئاسمانی تورکیا، لەگەڵ نزیکبوونەوەیان لە ئاسمانی هەرێمی کوردستان ئاگاداریان دەکەینەوە کە ناتوانن بنیشنەوە. 

- ئەو تەمەی لە هەولێر دروستبووە چاوەڕوان دەکرێت تاوەکو کاتژمێر 11 بەشێوەیەکی چڕ بمێنێتەوە. 


لەلایەکی دیکەوە: ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر بە ئاڤای ڕاگەیاند: بەهۆی تەمومژەوە شەش گەشتیی ئاسمانی فڕۆکەخانەی نێودەوڵەتیی هەولێر کە بەشێکیان هی ئەمشەو و بەشێکی دیکەیان هی بەرەبەیانی ڕۆژی سێشەممەن، دواخراوە. 

- ئێستا کار بە خشتە ناکەین، لەگەڵ نەمانی تەمومژ گەشتەکان دەستپێدەکەنەوە، تاوەکو ئێستاش وادەی دەستپێکردنەوەی گەشتەکان دیار نییە. 


نوێ دەکرێتەوە...