ئیلۆن مەسک: بە دۆڕانی ترەمپ دوایین هەڵبژاردنی ڕاستەقینە لە ئەمریکا دەکرێت

ئاڤا نیوز

 

ئیلۆن مەسک بەڕێوەبەری جێبەجێکاری کۆمپانیای تێسلا لە تۆڕی کۆمەڵایەتی ئێکس[ خۆی خاوەندارێتی دەکات] پشتگیری خۆی بۆ کۆمارییەکان دووپاتکردەوە و دەڵێت، بە دۆڕانی ترەمپ کۆتا هەڵبژاردنی ڕاستەقینە لە ئەمریکا ئەنجامدەدرێت. 

 

وێنە گەورەکە: لەگەڵ نزیکبوونەوەی هەڵبژاردنی سەرۆکایەتیی ئەمریکا ڕەخنە و پشتگیرییەکانی کەسانی دیار و سەرمایەدار بۆ دوو بەربژێرە سەرەکییەکە زیاد دەکات، ئیلۆن مەسک بازرگان و سەرمایەداری ئەمریکی  لەسەر کێشەی کۆچبەرانی نایاسایی لە ئەمریکا ڕەخنە لە پارتی دیموکراتەکان دەگرێت.

 

بڵاوکراوەی فەرمی: ئیلۆن مەسک پێیوایە هەڵبژاردنی سەرۆکایەتیی لە مانگی تشرینی دووەم دوایین هەڵبژاردنی ڕاستەقینەی وڵاتەکە دەبێت، ئەگەر دۆناڵد ترەمپ بەربژێری کۆمارییەکان بە ڕکابەرەکەی کامالا هاریس بدۆڕێنێت، چونکە ئامانجی دیموکراتەکان ئەوەیە کۆچبەری نایاسایی بە یاسایی بکەن، ئەمەش ئەمریکا دەگۆڕێت.

 

زانیاریی زیاتر: ئیلۆن مەسک ئاماژە بۆ ئەوە دەکات، زیاتر لە 15 ملیۆن کۆچبەری نایاسایی لە ئەمریکا هەن کە دیموکراتەکان لە هەوڵدان دەرچەی یاساییان بۆ بدۆزنەوە، هەروەها  دەیان ملیۆن کۆچبەری دیکە بهێننە وڵاتەکەیان.

 

ئەمەش بزانە: مەسک چەندین جار ڕەخنەی لە سیاسەتی کۆچبەرانی ئیدارەی ئێستای ئەمریکا  گرتووە، کە بە بۆچوونی ئەو، دەسەڵاتدارانی ئەمریکا هیچ شتێک ناکەن بۆ ڕێگریکردن لە هاتنە ناوەوەی کۆچبەرانی نایاسایی لەو وڵاتەدا و، جەختی لەوە کردەوە کە ئەگەر واشنتن سیاسەتی کۆچبەرانی نەگۆڕێت ئەمریکا دەڕوخێت.