سەرۆککۆماری ئێران گەیشتە بەغدا

ئاڤا نیوز 

 

مەسعود پزیشکیان، سەرۆککۆماری ئێران لە یەکەم گەشتیدا بۆ دەرەوەی وڵات دوای دەستبەکاربوونی، گەیشتە فڕۆکەخانەی نێودەوڵەتیی بەغدا و لەلایەن سەرۆکوەزیرانی عێراق پێشوازی لێ کرا. 

 

چیرۆکی سەرەکی: ڕۆژی چوارشەممە 11-09-2024، مەسعود پزیشکیان، سەرۆککۆماری ئیسلامیی ئێران لە یەکەمین گەشتی بۆ دەرەوەی وڵات سەردانی عێراقی کرد و بڕیارە لەپاڵ کۆبوونەوەی لەگەڵ سەرۆککۆمار و سەرۆکوەزیرانی عێراق، ژمارەیەک یاداشتنامەی لێکتێگەیشتن و ڕێککەوتن لە بواری ئەمنی و ئابووری واژۆ بکرێن.

 

لێدوانی فەرمی: پێش سەردانەکەی بۆ عێراق مەسعود پزیشکیان ڕایگەیاند: "سەردانی شارە شیعەنشینەکان و بەسرە و شارە کوردییەکان هەولێر و سلێمانی دەکەین، بە پشتیوانی خودا لەگەڵ خۆشەویستانی ئەوێ کۆدەبینەوە".

 

زانیاریی زیاتر: پزیشکیان پێیوایە سەردانەکەیان سەردانێکی "زۆرباش دەبێت بۆ دروستکردنی زەمینەی گونجاو لە بواری ئابووری، کولتووری، سیاسی و ئەمنی. هیوادارم لەگەڵ وڵاتانی ئیسلامی کە لە عێراقەوە دەستپێدەکات پەیوەندییەکی باش و دۆستانەمان هەبێت و بتوانین زۆربەی ئەو گرفتانەی کە ڕەنگە بوونیان هەبێت لەبەردەم خۆمان لا بدەین".

 

ئەوەی پێویستە بیزانیت: سەردانەکەی پزیشکیان بۆ عێراق ماوەی سێ ڕۆژ دەخایەنێت، سەردانی بەسرەو نەجەف دەکات، لە سەردانی بۆ هەرێمی کوردستان سەردانی هەولێر و سلێمانیش دەکات.