نووسینگەكانی كۆمسیۆن پرۆسەی ناردنی ئەنجامەكانی دەنگدان تاقیدەكەنەوە

ئاڤا نیوز 

 

نووسینگەكانی كۆمسیۆنی باڵای سەربەخۆی هەڵبژاردنەكان پرۆسەی ناردنی ئەنجامەكانی دەنگدان بۆ نووسینگەی سەرەكی لەبەغدا تاقیدەكەنەوە.

 

وێنە گەورەكە: ڕۆژی 20-10-2024 هەڵبژاردنی پەرلەمانی كوردستان بەڕێوەدەچێت و ئێستا كۆمسیۆنی باڵای سەربەخۆی هەڵبژاردنەكانی عێراق زۆرینەی ئامادەكارییەكانی تەواو كردووە.

 

لێدوانی فەرمی: خالید عەباس، بەرپرسی نووسینگەی دهۆكی كۆمسیۆنی باڵای سەربەخۆی هەڵبژاردنەكان بە ئاڤا نیوزی ڕاگەیاند: سبەی لە هەرسێ نووسینگەی كۆمسیۆن لە پارێزگاكانی هەولێر و سلێمانی و دهۆک، پرۆسەی تاقیكردنەوەی ناردنی ئەنجامەكانی دەنگدان بەڕێوەدەچێت، ئەمەش بۆ ئەوەیە لەڕۆژی دەنگداندا هیچ گرفتێک سەبارەت بە ناردنی ئەنجامەكانی هەڵبژاردن بۆ نووسینگەی سەرەكی كۆمسیۆن لە بەغدا نەبێت.

 

ئەوەی پێویستە بیزانیت: ناردنی ئەنجامەكانی دەنگدان لەڕێگەی ئەلیكترۆنییەوە دەكرێت و سەرجەم بنكەكانی دەنگدان لەڕێگەی تۆڕی ئینتەرنێتەوە بۆ نووسینگەی سەرەكی كۆمسیۆن لە بەغدا بەستراونەتەوە.

 

ئەوەش بزانە: لە دوو مانگی ڕابردوودا بۆ زانینی گرفتەكانی پرۆسەكە و چارەسەركردنیان، كۆمسیۆنی باڵای سەربەخۆی هەڵبژاردنەكان سێ هەڵبژاردنی ئەزموونی كردووە، بەرپرسی ئۆفیسی دهۆكی كۆمسیۆنیش ئاماژەی بە ئەوە دا كە دەنگدانە ئەزموونییەكان تەواو بوونە هیچی دیكە ناكرێت.