وادەی دەستپێکردنی بانگەشەی هەڵبژاردن دوادەخرێت

ئاڤا نیوز

 

پێشبینی دەکرێت وادەی دەستپێکردنی بانگەشەی هەڵبژاردن چەند ڕۆژێک دوابخرێت، بەهۆی دوورخستنەوەی سێ بەربژێر لەلایەن کۆمیسیۆنەوە. 

 

وێنە گەورەكە: بڕیارە 20-10-2024 هەڵبژاردنی پەرلەمانی كوردستان بکرێت، كۆمیسیۆن 16ـی ئەم مانگەی وەک دەستپێكی بانگەشە دیاری كردووە، بەڵام ئەگەری بەهێز هەیە وادەكە بۆ 20 تاوەكو 25ـی ئەم مانگە دوابخرێت.

 

لێدوانی فەرمی: خالید عەباس، بەرپرسی نووسینگەی دهۆكی كۆمیسیۆنی باڵای سەربەخۆی هەڵبژاردنەكان بە ئاڤا نیوزی ڕاگەیاند: ئەگەری بەهێز هەیە كە وادەی دەستپێكردنی بانگەشەی هەڵبژاردن چەند ڕۆژێک دوابخرێت.

 

هۆكارە زانراوەكان: لە ڕۆژانی ڕابردوودا كۆمیسیۆن سێ بەربژێرێ لە سێ لیستی جیاواز ڕەتكردەوە، دەبێت لایەنەكان سێ بەربژێری دیكە لە شوێنیان دابنێن، پاشان جارێكی دیكە هەرسێ ناوەكە بۆ وردبینی ڕەوانەی وەزارەتی ناوخۆ و دەستەی دەستپاكی بکرێن، دواتر ئەنجامەكەی بۆ نووسینگەی سەرەكی كۆمیسیۆن لە بەغدا دەنێردرێت و پەسەند دەكرێن.

 

زانیاریی زیاتر: ئەو ڕێكارانە پێویستی بە چەند ڕۆژێكە دەبێت و پێویستە لەڕێگەی نووسراوی فەرمییەوە بكرێت، ئەمەش هۆكاری سەرەكیی دواخستنی وادەی بانگەشە دەبێت.

 

باكگراوند: ڕۆژی 08-09-2024، کۆمیسیۆنی باڵای سەربەخۆی هەڵبژاردنەکانی عێراق، هەریەک لە شێروان ئەمین 'شێروان شێروانی' لە لیستی هەڵوێست، شڤان سەعید لە لیستی نەوەی نوێ و جەعفەر عوسمان عەبدوڵڵای لە لیستی گۆڕان دوورخستەوە.