سەرۆککۆماری ئێران دەچێتە بەسرە

ئاڤا نیوز 

 

دوای ئەوەی لە هەرێمی کوردستان کۆتایی بەسەردانەکەی هێنا، سەرۆککۆماری ئێران لە سلێمانییەوە بەرەو نەجەف بەڕێکەوت و ئەمڕۆش بۆ بەسەرکردنەوەی کۆمپانیا ئێرانییەکان کە لە بەسرە پرۆژەیان هەیە، سەردانی ئەو پارێزگایە دەکات.

 

وێنە گەورەکە: ڕۆژی پێنجشەممە 12-09-2024 لە دووەمین ڕۆژی سەردانەکەی بۆ عێراق، مەسعود پزیشکیان، سەرۆککۆماری ئێران گەیشتە هەولێر و لەلایەن سەرۆکی هەرێمی کوردستانەوە پێشوازیی لێکرا و لە هەولێر و سلێمانی ژمارەیەک دیدار و کۆبوونەوەی کرد.

 

چی ڕووی دا: پزیشکیان لە هەولێر لەگەڵ سەرۆک بارزانی و سەرۆکی هەرێمی کوردستان و سەرۆکوەزیران مەسرور بارزانی و بەرپرسانی دیکەی باڵای هەرێمی کوردستان کۆبووەوە، دواتر سەردانی سلێمانی کرد و لەگەڵ سەرۆک و بەرپرسانی یەکێتی کۆبووەوە، دواتریش سلێمانی بەرەو نەجەف جێهێشت و سەردانی مەزارگەی ئیمام عەلی لە نەجەف کرد و دواتر سەردانی مەزارگەکانی ئیمام حوسێن و ئیمام عەباسی لە کەربەلا کرد.

 

ئەوەی ئێستا ڕوودەدات: بڕیارە لە سێیەمین ڕۆژی سەردانەکەی بۆ عێراق ئەمڕۆ هەینی، سەرۆککۆماری ئێران سەردانی پارێزگای بەسرە دەکات و لە نزیکەوە ئەو پرۆژانە بەسەر دەکاتەوە کە لەلایەن کۆمپانیا ئێرانییەکانەوە لەو پارێزگایە جێبەجێ دەکرێن.