گرتنەوەی ئاوی زێی بچووک گرفت بۆ پڕۆژەکانی حەوزی ماسی دروست دەکات

ئاڤا نیوز

 

بەهۆی گرتنەوی ئاوی زێی بچووک لەلایەن کۆماری ئیسلامی ئێران، کاریگەری لەسەر جووتیارانی پشدەر و خاوەن پڕۆژەکانی ماسی لەو سنوورە دروست کردووە.

 

چیرۆکی سەرەکی: لە ڕێکەوتی 25-8-2024 کۆماری ئیسلامی ئێران، ئاوی زێی بچووکی گرتۆتەوە، ئەمەش مەترسی لەسەر جووتیاران و خاوەن پڕۆژەکانی ماسی دورست کردووە، گرفتەکە بەجۆرێکە بەشێک لە حەوزەکانی ماسی وشک بوون.

 

لێدوانی فەرمی: مارف مەحموود، بەڕێوەبەری ئاوی خاس لە سنووری پشدەر، بە ئاڤا نیوزی ڕاگەیاند: گرتنەوەی ئاوی زێی بچووک کاریگەری لەسەر زەوی جووتیارانی ناوچەکە دورستکردووە، بەشێک لە جووتیاران سەرقاڵی لێدانی بیر و قوڵکردنی بیرەکانیانن، لەلایەکی دیکەش گرتنەوەی ئاوەکە مەترسی لەسەر خاوەن پڕۆژەکانی ماسی لە سنووری پشدەر دورستکردووە.

 

زانیاریی زیاتر: سەرەتای گرتنەوەی ئاوی زیی بچووک کاریگەری لەسەر ئاوی ماڵان دروستکرد، ڕێککەوتنی 26-8-2024 نەمانتوانی ئاو بە قەڵادزێ بدەین، بەڵام دواتر توانیمان بەربەستەکە نۆژەن بکەینەوە و لە 27ـی مانگ توانامان ئاو بۆ ماڵان بەربدەینەوە، مارف مەحموود وای گوت.

 

زانیاریی بەدەستهاتوو: بە پێی زانیارییەکان کۆماری ئیسلامیی ئێران لەسەر ئاوی زێی بچووک کارەبا بەرهەم دەهێنێت، دواتریش بەردانەوە و گرتنەوەی ئاوەکە بەگوێرەی پێداویستی خۆیانە.

 

باکگراوند: زێی بچوک لە گوندی هەرزنە لە قەزای پشدەر دەڕژێتە هەرێمی کوردستانەوە، نزیکەی 400 کیلۆمەتر بەناو خاکی باشووری کوردستاندا تێدەپەڕێت، جگە لە پڕۆژەی ئاوی خواردنەوەی قەڵادزێ  و سلێمانی، سەدان حەوزی ماسی و هەزاران دۆنم زەوی کشتوکاڵی سوود لە ئاو  زێی بچووک وەردەگرن.