ئێران لە سەرووبەندی ساڵیادی گیانلەدەستدانی ژینا ئەمینی ڕێکاری تووند دەگرێتەبەر

ئاڤا نیوز

 

لە سەرووبەندی دووەمین ساڵیادی شۆڕشی "ژن ژیان ئازادی" 14 چالاکوانی ئەنجوومەنی پیشەیی مامۆستایانی کوردستان - لقی سنە، لەلایەن ناوەندە ئەمنییەکانی کۆماری ئیسلامیی ئێرانەوە بانگکراون.

 

چیرۆکی سەرەکی: 15ـی ئەم مانگە دووەمین ساڵیادی شۆڕشی "ژن ژیان ئازادی"ـە، بەپێی ڕاپۆرتی ڕێکخراوی مافی مرۆڤی هەنگاو، خانەی دادی گشتیی و شۆڕشی سنە و ناوەندە ئەمنییەکانی کۆماری ئیسلامیی ئێران، لەو شارە 14 چالاکوانی پیشەیی مامۆستایانی ئەو شارەیان بانگ کردووە.

 

ئەوەی پێویستە بیزانیت: ڕاپۆرتی ڕێکخراوەکە باس لەوە دەکات، ئەو چالاکوانانە بەتۆمەتی بانگەشە دژ بە کۆماری ئیسلامیی ئێران، تێکدانی ئاسایشی گشتیی و پێکهێنانی باند و گرووپ دژ بە ئاسایشی ئێران بانگکراون بۆ لێپرسینەوە. ئێران مەترسی هەیە 15ی مانگ مانگرتنی سەرتاسەری لە ڕۆژهەڵاتی کوردستان ڕابگەیێنرێت.

 

زانیاریی زیاتر: بەپێی ئەو ئاگادارکردنەوەیەی بۆ چالاکوانەکان نێردراوە، ئەو کەسانە دەبێت کاتژمێر 09:00ی بەیانی ڕۆژی شەممە 14ـی ئەم مانگە، واتە ڕۆژێک پێش دووەمین ساڵیادی گیانلەدەستدانی ژینا ئەمینی،  لە دامەزراوە دادوەری و ناوەندە ئەمنییەکان ئامادەبن. 

 

باکگرواند: شۆڕشی ژن ژیان ئازادی، دوای گیانلەدەستدانی ژینا ئەمینی، كچە كوردی ڕۆژهەڵاتی كوردستان سەریهەڵدا و زۆربەی شارەکانی ئێرانی گرتەوە.

ژینا ئەمینی کچێکی تەمەن 22 ساڵی خەڵکی سەقز بوو، 13-9-2022 لە وێستگەیەکی شەمەندەفەری تاران بەتۆمەتی پابەندنەبوون بە باڵاپۆشی لەلایەن پۆلیسی ڕەوشتی تارانەوە دەستگیرکرا، لە ڕووداوێکی گوماناویدا باری تەندروستیی تێکچوو و سێ رۆژ دواتر گیانی لەدەست دا.