پەرلەمانی عێراق لەبارەی سێ پڕۆژەیاسای پەیوەست بە شیعە، سوننە و کورد کۆدەبێتەوە

ئاڤا نیوز

ڕۆژی دووشەممە پەرلەمانی عێراق کۆدەبێتەوە و گفتوگۆ لەسەر سێ پڕۆژەیاسا دەکات، هەر یەکێکیان لەلایەن شیعە، سوننە و کوردەوە داوای پەسەندکردنیان دەکرێت.

وێنەگەورەکە: سەرەڕای ناڕەزایی ڕێکخراوەکانی کۆمەڵگەی مەدەنی و ژنان، بەڵام شیعەکان ماوەی چەند مانگێکە داوای هەمواری یاسای باری کەسێتی دەکەن، سوننەکانیش بە بەڵێنی دەرچواندنی یاسای لێبوردنی گشتی بەشداری حکومەتەکەی سوودانییان کردووە، لەبەرامبەریشدا کورد داوای پەسەندکردنی پرۆژەیاسایەک دەکات کە بەهۆیەوە مووڵک و زەوی لە کەرکووک و ناوچە کوردستانییەکانی دەرەوەی ئیدارەی هەرێمی کوردستان بۆ خاوەنەکانیان دەگەڕێتەوە.

ڕاگەیێنراوی فەرمی: سەرۆکایەتیی پەرلەمانی عێراق بڵاویکردەوە، ڕۆژی 16ی ئەیلول پەرلەمانی عێراق بۆ گفتوگۆکردن لەسەر شەش بڕگە کۆدەبێتەوە، یەکێک لەوانە بریتییە لە دەنگدان لەسەر یاسای گەڕاندنەوەی خاوەندارێتی مووڵک و ماڵی داگیرکراو بەفەرمانی ئەنجوومەنی سەرکردایەتی شۆڕشی هەڵوەشاوە.

لەلایەکی دیکەوە: هەر لە کۆبوونەوەکەدا خوێندنەوەی دووەم بۆ هەمواری  یاسای باری کەسێتی و لێبوردنی گشتی دەکرێت، کە یەکەمیان شیعەکان مەبەستیان تێپەڕێنرێت و دووەمیشیان داواکاری لەمێژینەی سوننەکانە.

لێدوانی فەرمی: شوان کەلاری، پەلەمانتاری عێراق لەفراکسیۆنی پارتی بەئاڤا نیوزی گوت: لەبەرامبەر تێپەڕاندنی دوو پڕۆژەیاسا کە هەردوو لایەنی شیعە و سوننە داوای دەکەن، ئێمەش بە مافی خۆمان زانیوە داوای پەسەندکردنی یاسای گەڕاندنەوەی خاوەندارێتی سەرجەم مووڵک و ماڵی داگیرکراوی میللەتەکەمان بکەین.