لە عێراق 85٪ـی دەستی کاری بیانی هیچ کارامەییەکیان نییە

ئاڤا نیوز

 

نزیکەی ملیۆنێک کرێکاری بیانی لە عێراق هەن، لەو ژمارەیە 95٪یان بە نایاسایی هاتوونەتە ناوخۆی وەڵاتەوە، 85٪یان خاوەن هیچ کارامەییەک نین و ساڵانە زیاتر لە دوو ملیار دۆلار دەبەنە دەرەوەی عێراق.

 

وێنە گەورەکە: لە ماوەی چەند ساڵی ڕابردوودا دەیان هەزار کرێکاری بیانی لە باشووری ئاسیا و هەندێک وڵاتانی دیکەی ئەفریقا بە شێوەی نایاسایی ڕوویان لە عێراق کردووە و شارەزایی و کارامەییان لە هیچ بوارێکدا نییە.

 

لێدوانی فەرمی: مەزهەر محەممەد ساڵح، ڕاوێژکاری ئابووریی سەرۆکوەزیرانی عێراق بە ئاڤا نیوزی ڕاگەیاند: ڕێژەی کرێکاری شارەزا و پسپۆڕی کرێکارانی بیانی لە عێراق تەنیا لە سەدا 15ـی کۆی کرێکارانی بیانی پێکدەهێنن لە بەرامبەردا 85٪یان کارامەیی و شارەزاییان نییە.

 

ساڵانە ئەو بڕە پارەیەی لەلایەن کرێکارانی بیانییەوە دەچێتە دەرەوەی وڵات بە لایەنی کەمەوە بە دوو ملیار دۆلار دەخەمڵێنرێت، مەزهەر محەممەد ساڵح وادەڵێت.

 

ئەوەی پێویستە بیزانیت: ژمارەی کرێکارە بیانییەکان لە عێراق بە نزیکەی یەک ملیۆن کرێکار مەزەندە دەکرێت کە 95%یان نایاسایین، بەشی زۆریان ئەزموونی مامناوەند یان کارمەییەکی سنوورداریان هەیە.