دانیشتنی دادگای فیدراڵی بۆ تاوتوێی دوو سکاڵا دوادەخرێت

ئاڤا نیوز

 

ئەمڕۆ بڕیاربوو دادگای فیدراڵی لەسەر دوو سکاڵا کۆببێتەوە کە یەکێکیان دژی بڕیارەکانی ئەنجوومەنی سەرکردایەتیی شۆڕشی حیزبی بەعس و ئەوەی تریشیان تایبەتە بە زەوییە کشتوکاڵییەکانی قەزای داقووق بوو.

 

وێنە گەورەکە: بەگوێرەی بڕیارەکانی ئەنجوومەنی سەرکردایەتیی شۆڕشی هەڵوەشاوە، بەشێک لە زەوییە کشتوکاڵییەکانی جوتیارانی کورد و تورکمان و پێکهاتەکانی دیکە لە کەرکووک و پارێزگاکانی دیکەی عێراق، لە خاوەن زەوییەکان وەرگیراونەتەوە و موڵکایەتییان دراوەتە دەست وەزارەتی دارایی.

 

چیرۆکی سەرەکی: بە گوێرەی خشتەی کۆبوونەوەکانی دادگەی باڵای فیدراڵی، بڕیاربوو ئەمڕۆ سکاڵای بەشێک لە جووتیارانی کورد و پێکهاتەکانی دیکە تاوتوێ بکرێت، کە داوایان کردووە بڕیارەکانی ڕژێمی پێشووی عێراق، بە نادەستووری لە قەڵەم بدرێت.

 

زانیاریی بەدەستهاتوو: دەروون مەلا ناجی، پەیامنێری ئاڤا لە بەغدا ڕایگەیاند: دادگای باڵای فیدراڵی عێراق بڕیاردان لە بارەی هەڵوەشاندنەوەی بڕیارەکانی ئەنجوومەنی سەرکردایەتی شۆڕشی هەڵوەشاوەی بەعسی بۆ رۆژی 13ی تشرینی دووەم دواخست.