كڕین و فرۆشتن بە زەوییەکانی سنووری ماددەی 140 قەدەغە دەكرێت

ئاڤا نیوز

 

جێگری سەرۆکی پەرلەمان لە کۆنگرەیەکی ڕۆژنامەوانیدا ڕایگەیاند: پەرلەمانی عێراق كڕین و فرۆشتن بە زەوییەکانی سنووریی ماددەی 140 قەدەغە دەكات.

 

لێدوانی فەرمی: شاخەوان عەبدوڵڵا، جێگری سەرۆكی پەرلەمانی عێراق بە ئاڤا نیوزی ڕاگەیاند: ئەو پڕۆژەیەی كە سەبارەت بە گرفتی ناوچەكانی ماددەی 140 لە حكوومەتی عێراقەوە هاتووە جیاوازە لەوەی كە ئێمە پێشكەشمان كردووە، ئەوە كە لە حكوومەتی عێراق هاتووە ئەگەر بڕوات زیانی زیاترە.

 

زانیاریی زیاتر: بەپێی پڕۆژەكەی حكوومەتی عێراق، بڕیار ڕاگرتنی كڕین و فرۆشتنی زەویی ناوچەكانی ماددەی 140 ئەو زەویانە ناگرێتەوە كە بۆ نەوت و بەرگری تەرخان كراون، هەموو زەوییەكانی جووتیارانی كوردیش دەچنە ئەو چوارچێوەیەوە، بۆیە ئێمە دەستكاریمان كرد، هاوكات چەند ناوچەیەک لەبیركرابوو زیادمان كرد.

 

ئەوەش بزانە: ئەمشەو كۆبوونەوەی فراكسیۆنە كوردستانییەكان و فراكسیۆنەكانی شیعە بۆ گفتوگۆكردن سەبارەت بە ئەو خاڵانەی كە فراكسیۆنە كوردستانییەكان لە پڕۆژەكە زیادیان كردووە دەكرێت و سبەی كۆبوونەوەی حكوومەت و سەرجەم فراكسیۆنەكانی پەرلەمان بەڕێوەدەچێت.

 

لەلایەكی دیكەوە: شاخەوان عەبدوڵڵا ڕایگەیاند: "بەكرێدانی زەوییەكانی سنووری ماددەی 140 مەترسییەكی گەورە بوو بەڵام ئێمە لێرەین و ناهێڵین هیچ شتێكی وا تێپەڕێت، بە هەموو جووتیارانی شنگال تاوەكو مەندەلی ڕادەگەیێنین كە بڕیار دراوە و هیچ زەوییەک لەسنووری ماددەی 140 كڕین و فرۆشتنی پێوە نەکرێت، تا ئەو كاتەی كە لیژنەی ماددەی 140 جێبەجێ دەكرێت".