وادەی دەستپێکردنی بانگەشەی هەڵبژاردن ئاشکرا دەکرێت

ئاڤا نیوز

 

كۆمسیۆن وردبینی ناوی بەربژێرەكانی تەواو نەكردووە، ئەمەش وادەی دیاریكراوی بانگەشەی دواخست، پێشبینی دەكرێت سەرەتای هەفتەی داهاتوو دەستپێبكات.

 

وێنە گەورەكە: ڕۆژی 20-10-2024، هەڵبژاردنی پەرلەمانی كوردستان بەڕێوەدەچێت، وابڕیار بوو 16ی ئەم مانگە بانگەشە دەستپێبكات، بەڵام بەهۆی ئەوەی كۆمسیۆن ووردبینی لە ناوی بەربژێرەكانی تەواو نەكردووە و تاوەكو ئێستا وادەی دەستپێكردنی بانگەشە دیار نییە.

 

لێدوانی فەرمی: ئامانج عەزیز، بەرپرسی نووسینگەی كۆمسیۆن لە سلێمانی بە ئاڤا نیوزی ڕاگەیاند: "تاوەكو ناوی  بەربژێرەكان لەلایەن ئەنجوومەنی كۆمسیارانەوە پەسەند نەكرێت بانگەشە دەستپێناكات، بەپێی یاسای هەڵبژاردن  ڕۆژێک بەر لە پەسەندكردنی ناوی بەربژێر و پارتی سیاسی و هاوپەیمانییەكان بانگەشە دەستپێدەكات، پێشبینی دەكەم بانگەشەی هەڵبژاردن بكەوێتە دوای 20ی ئەم مانگە".

 

لەلایەكی دیكەوە: مەروان محەممەد، بەرپرسی نووسینگەی هەولێری كۆمسیۆن بە ئاڤا نیوزی ڕاگەیاند: هێشتا كۆمسیۆن وردبینیكردنی ناوی بەربژێرەكانی تەواو نەكردووە و تاوەكو ئێستا وادەی دەستپێكردنی بانگەشە دیار نییە و پێشبینی ناكەم لەم هەفتەیە دەستپێبكات.

 

زانیاریی زیاتر: سەبارەت بە هەمان پرس، خالید عەباس، بەرپرسی نووسینگەی دهۆكی كۆمسیۆن بە ئاڤا نیوزی ڕاگەیاند: ئەستەمە ئەم هەفتەیە بانگەشە دەستپێبكات، پێشبینی دەكەم لە 20 تاوەكو 25ی ئەم مانگە دەستپێبكات.