دانا ئەحمەد مەجید بۆ ئاڤا: گۆڕان بەشداری هەڵبژاردن دەکات

ئاڤا نیوز

دانا ئەحمەد مەجید، یەکێک لە بەربژێرە بەهێزەکان بۆ بوون بە ڕێکخەری گشتیی بزووتنەوەی گۆڕان لە ڕێگەی ئاڤاوە بەشداریکردنی بزووتنەوەی گۆڕان  لە هەڵبژاردنی پەرلەمانی کوردستان دووپاتدەکاتەوە.

 

وێنە گەورەکە: بڕیارە ڕۆژی 20-10-2024، هەڵبژاردنی گشتیی پەرلەمانی کوردستان بەڕێوەبچێت و لەم هەڵبژاردنەدا، ژمارەیەک هێز و بەربژێری سەربەخۆ بۆ یەکەمجار بەشداری هەڵبژاردن دەکەن. بزووتنەوەی گۆران وەک هێزێکی بەشدار لە پرۆسەی سیاسی کوردستان لە ڕابردوودا دەنگۆی ئەوە هەبوو بەشداری هەڵبژاردن ناکات، بەڵام یەکێک لەبەربژێرە بەهێزەکان بۆ پۆستی ڕێکخەری گشتیی بزووتنەوەکە هەواڵی بەشداری گۆڕانی لە هەڵبژاردن بۆ ئاڤا پشتڕاستکردەوە.

 

لێدوانی فەرمی: دانا ئەحمەد مەجید، بە ئاڤا نیوزی گوت: "یەکەمجارە قسە دەکەم و لە هیچ میدیایەکی دیکە قسەم نەکردووە، لەگەڵ بەشداریکردنی گۆڕانم لە هەڵبژاردن و بڕیاری کۆتاییش لای گۆڕانە."

 

دانا ئەحمەد مەجید دەشڵێت: ''گۆڕان بەشداری هەڵبژاردن دەکات، بەڵام مەرج نییە لە ئایندەدا بەشداری حکومەت بکەین، ئەگەر ببم بە ڕێکخەری گشتیی، هەتا حکومەت پێکنەهێنم بەشداری حکومەت ناکەم''.

 

لەلایەکی دیکەوە: پێشتر ئاڤا نیوز ئاشکرای کرد کە دانا ئەحمەد مەجید، بەهێزترین بەربژێرە بۆ بوون بە ڕێکخەری گشتیی بزووتنەوەی گۆڕان و کۆدەنگیش لەوبارەیەوە لەنێو بزووتنەوەکە هەیە. ناوبراو لەڕێگەی ئاڤاوە هەواڵەکەی پشتڕاستکردەوە و گوتی، "ڕاستە ئەوان [ گۆڕان] دەیانەوێت ببم بە ڕێکخەری گشتی و هەموو لایەک ڕازین و خۆشم ڕازیم، بەڵام هەندێک ڕێکار هەیە دەبێت تەواو بکرێت."