عێراق و ڕووسیا لەبواری وزەی ئەتۆم یاداشتێکی لێکتێگەیشتن واژۆ دەکەن

ئاڤا نیوز

 

دەستەی وزەی ئەتۆمی عێراق و دامەزراوەی وزەی ئەتۆمی ڕووسیا "ROSATOM" یاداشتێکی لێکتێگەیشتن لەبواری بەکارهێنانی ئاشتیانەی وەزەی ئەتۆم لەنێوانیان واژۆ دەکەن.

 

لێدوانی فەرمی: نەعیم عەبودی، وەزیری خوێندنی باڵاو توێژینەوەی زانستی و سەرۆکی دەستەی وزەی ئەتۆمی لە عێراق ڕایگەیاند: لە پەراوێزی چالاکییەکانی شەست و هەشتەمین کۆنفرانسی گشتیی ئاژانسی نێودەوڵەتی وزەی ئەتۆمی لە ڤییەنا یاداشتێکی لێکتێگەیشتنمان لەگەڵ، بەڕێوەبەری گشتیی دامەزراوەی حکومی ڕووسیا لەبوای هاوکاری دوولایەنە واژۆ کرد.

 

زانیاریی زیاتر: بەگوتەی عەبودی "ئەم یاداشتە یەکەم یاداشتە لەبواری بەکارهێنانی ئاشتییانەی وزەی ئەتۆم کە عێراق لە دوای ساڵی 2003 واژۆی لەسەر کردووە، هاوکات یەکەم یاداشتیشە بۆ دەستەی وزەی ئەتۆمی عێراق دوای دەرکردنی یاساکە".

 

ئەوەی پێویستە بیزانیت: "یاداشتنامەی لێکتێگەیشتنی دوولایەنە گرنگییەکی تایبەتی هەیە، چونکە بە نەخشەی ڕێگایەک دادەنرێت بۆ کاری هاوبەش لە بواری بەکارهێنانی ئاشتییانەی وزەی ئەتۆمیدا". نەعیم عەبودی وا دەڵێت.

 

لەلایەکی دیکە: بەڕێوەبەری کۆمپانیای ڕۆساتۆم، ئەلێکسی لیخاچۆڤ، ڕژدبوونی لایەنی ڕووسیای لە هەماهەنگی نێوان هەردوو وڵات دەربڕی بە مەبەستی بەرجەستەکردنی یاداشتنامەی لێکتێگەیشتنی دوولایەنە لە شێوەی بەرنامەی زانستی هاوبەش لە بواری بەکارهێنانی ئاشتییانەی وزەی ئەتۆمی.