پێنج بەربژێری دیکە لەلایەن کۆمیسیۆن دووردەخرێنەوە

ئاڤا نیوز

 

کۆمیسیۆنی باڵای هەڵبژاردنەکانی عێراق شیاوبوونی پێنج بەربژێری دیکە بۆ خولی شەشەمی پەرلەمانی کوردستان ڕەتدەکاتەوە، ماوەی سێ ڕۆژیش بە لایەنەکان دەدات ناوی بەربژێری دیکە پێشکەش بکەن.

 

ڕاگەیێنراوی فەرمی: بەپێی بڕیاری ئەنجوومەنی کۆمیسیاران شیاوبوونی پێنج بەربژێر لە لیستەکانی "نەوەی نوێ، پارتی دیموکراتی کوردستان، بزووتنەوەی گۆڕان و هاوپەیمانی کوردستانی" ڕەتکردووەتەوە.

 

زانیاریی زیاتر: هەریەک لە "شتاو عەزیز حەمە مستەفا" و "موردان نەوزاد حەمەساڵح حەسەن" بەربژێرانی نەوەی نوێ لە بازنەی پارێزگای دهۆک، بەهۆی پێشکەشنەکردنی بەڵگەنامەی پێویست بۆ سەلماندنی مەرجەکانی خۆبەربژێرکردن بەتایبەت لە شوێنی نیشتەجێبوون لە دهۆک دوورخراونەتەوە.

 

لەلایەکی دیکەوە: هەریەک لە "حەسەن ڕەزا محەممەد ساڵح، لە پارتی دیموکراتی کوردستان، موحسن مستەفا حەمەد ئەمین، لە بزووتنەوەی گۆڕان لە سنووری پارێزگای سلێمانی و نەجات ڕەمەزان کانەبی، لە هاوپەیمانی هەرێمی کوردستان لە سنووری پارێزگای هەولێر" دوورخراونەتەوە.

 

ئەوەی پێویستە بیزانیت: ئەنجوومەنی کۆمیسیاران لە ڕۆژی ڕاگەیاندنی ئەو بڕیارەوە ماوەی سێ ڕۆژی بەو لایەنانە داوە تاوەکو ناوی بەربژێری دیکە پێشکەش بکەن.

 

ئەمەش بزانە: پێشتر بە هەمان هۆکار و نەبوونی مەرجی پێویست بۆ بەربژێربوون  سێ بەربژێری دیکە لەلایەن کۆمیسیۆن دوورخرابوونەوە.