وەزارەتی پەروەردە بە پلانێک کار بۆ دامەزراندنی وانەبێژانی دابڕاو دەکات

ئاڤا نیوز

 

زیاتر لە 38 هەزار مامۆستای وانەبێژی سەر بە وەزارەتی پەروەردە کراونەتە گرێبەست، نزیکەی دوو هەزار وانەبێژی دیکە کە لە ماوەی ساڵانی ڕابردوو بە هۆکاری جیاواز لەکار دابڕاون، داوای بە گرێبەستکردن دەکەن.

 

وێنە گەورەکە: لەدوای ساڵی 2014 ژمارەیەک مامۆستای وانەبێژ بە هۆکارەکانی هاتنە شوێنی میلاک، منداڵبوون یان وازهێنان دابڕاون و ژمارەیان نزیکەی دوو هەزار کەسە، وەزارەتی پەروەردە بەگوێرەی پلانێک کار لەسەر گەڕانەوە و بە گرێبەستکردنیان دەکات.

 

لێدوانی فەرمی: د. ئالان حەمە سەعید، وەزیری پەروەردە لە وەڵامی پرسیاری شەوکەت قادر پەیامنێری ئاڤا لە هەولێر سەبارەت بە مامۆستایانی دابڕاو ڕایگەیاند، "داتا بەیسێکمان بۆ سەرجەم بەڕێوەبەرایەتییە گشتییەکانی پەروەردە ناردووە، بۆ ئەوەی فۆڕمی وانەبێژە دابڕاوەکانیان پڕبکەنەوە، لە کاتی دروستبوونی بۆشایی ئەولەویەت بەو وانەبێژانە دەدرێت بۆ ئەوەی بە گرێبەست بکرێن و لە ناوەندەکانی خوێندن وانە بڵێنەوە".

 

باکگراوند: ڕۆژی 16-09-2024 فەرمانی دامەزراندنی مامۆستایانی وانەبێژ لە قوتابخانەکان واژۆ کرا و لە مووچەی مانگی نۆوە بەگرێبەست وەریدەگرن.