سعودیە: بێ دروستکردنی دەوڵەتی فەڵەستین هیچ پەیوەندییەک لەگەڵ ئیسرائیل دروست ناکەین

ئاڤا نیوز

 

شازادەی جێنشینی سعودیە تاوانەکانی ئیسرائیل لە کەرتی گەمارۆدراوی غەززە ئیدانە دەکات و  دەڵێت، بەبێ دامەزراندنی دەوڵەتێک بۆ فەڵەستینییەکان سعودیە ئامادە نییە پەیوەندی دیپلۆماسی لەگەڵ ئیسرائیل دروست بکات.

 

لێدوانی فەرمی: محەمەد بن سەلمان بن عەبدولعەزیز، شازادەی جێنشینی سعودیە ڕایگەیاند، سعودیە بەردەوام  دەبێت لە هەوڵەکانی بۆ دامەزراندنی دەوڵەتێک بۆ فەڵەستینییەکان کە پایتەختەکەی قودس بێت و  بەبێ ئەو هەنگاوە ڕیاز پەیوەندی دیپلۆماسی لەگەڵ تەلئەڤیڤ دروست ناکات.

 

لەلایەکی دیکەوە: شازادەی جێنشینی سعودیە، سوپاس ئەو وڵاتانەی کرد کە دانیان بە دەوڵەتی فەڵەستین ناوە وەک کیانێکی شەرعی نێودەوڵەتی و داوای لە وڵاتانی دیکە کرد، بەردەوام بن لە پشتگیری کردنی فەڵەستین.

 

ئەمەش بزانە: پێش هێرشی حەماس  بۆسەر ئیسرائیل لە حەوتی ئۆکتۆبەر، هەوڵێک هەبوو لەلایەن ئەمریکاوە بۆ نزیک کردنەوەی ئیسرائیل و سعودیە  و ئاسایی کردنەوەی پەیوەندییەکانیان. بەڵام دوای ئەو ڕووداوە و هێرشی ئیسرائیل بۆسەر کەرتی غەززە، سعودیە پاشەکشەی لەو دەستپێشخەرییەی واشنتن کرد.