ئاڤا نیوز لیستی هاوکاتکراوی مووچە لەنێوان هەولێر و بەغدا بڵاودەکاتەوە

ئاڤا نیوز

بڕیارە لەمەودوا خشتەی دابەشکردنی مووچە لە هەرێمی کوردستان و عێراق هاوکات بکرێت، واتە مووچەخۆرانی هەرێمی کوردستان و عێراق پێکەوە مووچە وەردەگرن.

وێنە گەورەکە: بەپێی خشتەی جێگیری وەزارەتی دارایی عێراق، لە 13ی هەموو مانگێک دەست بە دابەشکردنی مووچە دەکرێت و تاوەکو سەری مانگ سەرجەم فەرمانبەران مووچە وەردەگرن، مووچەی خانەنشینانیش بە مەدەنی و سەربازییەوە دەکەوێتە یەک و دووی مانگی دواتر.
 

لێدوانی فەرمی: سەرچاوەیەکی باڵا لە حکومەتی عێراق بە ئاڤا نیوزی ڕاگەیاند، سیستمی دارایی و ژمێریاریی نێوان هەردوو حکومەت و وادەی دابەشکردنی مووچە لەنێوان هەولێر و بەغدا یەکدەخرێت، بەمپێیە لەمەودوا مووچەخۆران لە یەک کاتدا مووچە وەردەگرن. 

 

خاڵی ئەرێنی: سەرچاوەکەی ئاڤا دڵنیایی دا کە پارەی تەواوی دابینکردنی مووچە لەبەردەستە. ڕەتیشی کردەوە تەیف سامی، وەزیری دارایی هیچ لێدوانێکی دابێت و گوتبێتی پارەی پێویست بۆ مووچە نییە.

 

لەلایەکی دیکەوە: د.عەبدولحەکیم خەسرۆ، سەرۆکی فەرمانگەی هەماهەنگی و بەدواداچوون کە ئەندامی شاندی هەرێمی کوردستانە بۆ بەغدا، بە ئاڤا نیوزی گوت: لە کۆبوونەوەکانی هەفتەی داهاتوو گفتوگۆ بۆ یەکلاکردنەوەی هاوتاکردنی خشتەی مووچە دەکرێت. 

بابەتی ستراتیژی:  مووچەی مانگی نۆ و مانگەکانی دواتر تاوەکو کۆتایی ئەمساڵ، واتە تاوەکو مانگی 12 بێ کێشە دەنێردرێت، ئەوەی دەمێنێتەوە مووچەی مانگی هەشتە، هەندێ گرفتی هەیە و هەفتەی داهاتوو گفتوگۆی لەسەر دەکرێت.

 

ئەوەی پێویستە بیزانیت: لیستی نوێی مووچە ئامادەکراوە و یەکشەممەی داهاتوو 22-09-2024، شاندێکی هەرێمی کوردستان سەردانی بەغدا دەکات و ڕادەستی وەزارەتی دارایی عێراقی دەکەن. وەک د. ئومێد سەباح، سەرۆکی دیوانی ئەنجوومەنی وەزیران پێشتر قسەی بۆ ئاڤا نیوز کردبوو، بڕیارە هەفتەی داهاتوو مووچەیەک بنێردرێت و دوو هەفتە دواتریش مووچەیەکی تر.

 

خاڵی نەرێنی: سەرچاوەیەک لە وەزارەتی دارایی عێراق بە ئاڤا نیوزی گوت، وێڕای ئەوەی خشتەی وەزارەتی دارایی عێراق جێگیرە و 13ی هەموو مانگێک دەستپێدەکات، بەڵام تاوەکو ئەمڕۆ کە 19ی مانگە،  بەهۆی نەبوونی پارەی نەختینە دەست بە دابەشکردنی مووچە نەکراوە و هیچ یەکێک لە وەزارەتەکان مووچەیان وەرنەگرتووە.

 

 

لیستی جێگیری وەزارەتی دارایی عێراق بەمشێوەی خوارەوەیە، لەناو کەوانە ئەگەر ناوی وەزارەت و دامودەزگاکان لە هەرێمی کوردستان جیاواز بێت لە هی عێراق ئاماژەی پێکراوە.