155 كەس بەهۆی خۆپێشاندانەكانی 17ـی شوبات پۆستی باڵایان وەرگرتووە

ئاڤا نیوز 

بە سوود وەرگرتن لە خۆپێشاندانەكانی 17ـی شوبات و رۆژانی دواتر لە سلێمانی، زیاتر لە 155 كەس پۆستی باڵایان لەنێو پەرلەمان و حكومەتی هەرێمی كوردستان، ئەنجوومەنی نوێنەرانی عێراق و حكومەتی عێراق، وەرگرتووە.

وێنە گەورەكە: خۆپێشاندانەكانی 17ـی شوباتی 2011، ماوەی 62 ڕۆژی خایاند و ڕۆژانە ژمارەیەكی زۆری خەڵك لە بەردەركی سەرا لە سلێمانی كۆدەبوونەوە و كەسانی جیاوازی حیزبی و ناحیزبی گوتاریان پێشكەشدەكرد. دواتر زۆرینەیان بوونە كاندیدی پارتەكانیان بۆ هەڵبژاردنی پەرلەمانی كوردستان و ئەنجوومەنی نوێنەرانی عێراق. بەشێكی زۆری ئەوانەی گوتاری هەست و سۆز خرۆشانی جەماوەرییان لە "سەرا" پێشکەش دەکرد، بوونە پەرلەمانتار و بەشێكیشیان بەهۆی حیزبەكانیانەوە پۆستی باڵای حكومییان وەرگرت.

ئەوەی پێویستە بیزانیت: بەپێی ئەو بەدواداچوونەی ئاڤا نیوز كردوویەتی، زیاتر لە 155 كەس لە بزووتنەوەی گۆڕان، كۆمەڵی دادگەری و یەكگرتووی ئیسلامی بە سوودوەرگرتن لە خۆپێشاندانەكانی 17ـی شوبات و رۆژانی دواتر، پۆستی باڵایان لە دامەزراوە گرنگەكانی دەسەڵاتی یاسادانان، جێبەجێكردن و دادوەری وەرگرتووە، بەشێكیشیان دوای تەواوكردنی ئەركەكانیان بە پلەی باڵا خانەنشینكراون.