سەعدی پیرە: من دەمزانی دۆخی مەلا بەختیار وای لێ دێت

ئاڤا نیوز

 

گوتەبێژی یەکێتی نیشتمانی کوردستان باس لەوە دەکات، کە مەلا بەختیار نە سەرۆکی حزبەکە و نە سەرکردایەتییەکەی قبووڵ نەبووە و دژیان کاری کردووە، بۆیە پێی گوتراوە دەزگای چاودێر چۆڵ بکە.

 

وێنە گەورەکە: سەعدی ئەحمەد پیرە، گوتەبێژی یەکێتی نیشتیمانی کوردستان میوانی هەواڵەکانی کاتژمێر 7:00 هەوراز گوڵپی بوو، گفتوگۆیان لەسەر چەند تەوەرێکی گرنگ و پەیوەندیدار بە یەکێتی و هەرێمی کوردستان کرد.

 

لێدوانی فەرمی: سەعدی پیرە، بە ئاڤا میدیای ڕاگەیاند: مەلا بەختیار بەرپرسی ڕێکخراوە دیموکراتییەکانی یەکێتی بوو، بەڵام بڕوای یەکێتی وایە کە چیتر ئەو سەربەم حزبە نییە، بۆیە کەسێکی دیکە لەبری ئەو بۆ بەڕێوەبردنی دەزگای چاودێر و 12 دەزگاکەی دیکە دادەنێت، بینا و خەرجییەکانی ئەو دەزگایانەش سەربە یەکێتییە، پێشوەخت دەمزانی ئەمە بەسەر مەلا بەختیار دێت، چونکە دۆستی من بووە و دەیان جار پەیوەندیم پێوەکردووە لەسەر ئەم بابەتە.

 

ئەوەی پێویستە بیزانیت: کەسێک سەرکردایەتیی حیزبەکەی و سەرۆکی حزبەکەی قبووڵ نەبێت، لە کام حزبە؟، شەو و ڕۆژ دژی یەکێتی کار دەکات، بۆیە یەکێتی پێی گوت مادام سیاسەتت ئەوەیە لە کام شوێن پێتخۆشە بچۆ لەوێ کار بکە و دەزگاکەی من چۆڵ بکە.