ئەمساڵ 550 هەزار تۆن سەوزە و میوە لە هەولێرەوە هەناردەی عێراق کراوە

ئاڤا نیوز

 

بەگوێرەی ئاماری بەڕێوەبەرایەتیی گشتیی کشتوکاڵی هەولێر، ئەمساڵ بەرهەمی سەوزە و میوەی هەناردەکراوی جووتیاران بۆ شارەکانی ناوەڕاست و خوارووی عێراق گەیشتووەتە 550 هەزار تۆن.

 

وێنە گەورەکە: چەند ساڵێکە حکومەتی هەرێمی کوردستان، ستراتیژیەتی بەبازاڕکردنی بەرهەمی ناوخۆیی پەیڕەو دەکات و بەرهەمی جووتیاران هەناردەی شارەکانی عێراق و وڵاتانی عەرەبی و ئەوروپی دەکات.

 

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤا نیوزی ڕاگەیاند: لە ماوەی هەشت مانگی ئەمساڵدا 550 هەزار تۆن سەوزە و میوە لە عەلوەی هەولێرەوە بارکراوە بۆ شارەکانی ناوەڕاست و خوارووی عێراق، جگە لەوە 250 هەزار تۆن لە ناوخۆ بەبازاڕ کراوە، بەرهەمی هەناردەکراو دوو هێندەی ئەو بەرهەمەیە کە لەناوخۆ ساغکراوەتەوە.

 

ئەوەی پێویستە بیزانیت: ئەو بەرهەمانەی ئەمساڵ هەناردەکراون بریتین لە پەتاتە، تەماتە، شووتی، کاڵەک، خەیار، باینجان و سەرجەمیان لەناوچە کشتوکاڵییەکانی دەوربەری هەولێر چێنراون.