ئەنجوومەنی دادوەریی عێراق ڕوونکردنەوە لەبارەی هەمواری یاسای باری کەسیی دەدات

ئاڤا نیوز

 

ئەنجوومەنی باڵای دادوەریی عێراق ڕەتی دەکاتەوە کە هەمواری پڕۆژەیاسای باری کەسیی ڕێگە بە بەشوودانی کچانی خوار تەمەن یاسایی بدات.

 

وێنە گەورەکە: ئەنجوومەنی باڵای دادوەری لەگەڵ شاندێکی پەرلەمانی عێراق کۆبووەوە و لەبارەی هەمواری یاسای باری کەسی گفتوگۆیان کرد و هەڵوێستی خۆیان لە بەرامبەر پرسەکە خستەڕوو.

 

ڕاگەیێنراوی فەرمی: ئەنجوومەنی باڵای دادوەریی عێراق ڕایگەیاند: بیرۆکەی هەموارکردنی یاساکە پشت بە ماددەی 41ـی دەستووری عێراق دەبەستێت کە ئاماژە بە ئازادیی بابەتی باری کەسیی دەکات بەپێی هەڵبژاردنی ئایین و بیروباوەڕی خۆیان.

 

زانیاریی زیاتر: یاسای پێشنیازکراو، باسی ئەو بڕگە وردانەی نەکردووە کە پەیوەندییان بە بابەتە خێزانییەکانەوە هەیە، وەک هاوسەرگیری جیابوونەوە، سەرپەرشتیکردن و نەفەقە و بابەتی دیکەی پەیوەست بە لایەنی شەریعەت و فیقهەوە.

 

ئەوەی پێویستە بیزانیت: ئەنجوومەنەکە ئەو بابەتانە بۆ هەردوو ئەنجوومەنی زانستیی ئەوقافی شیعە و سوننە جێهێشتووە کە لەمبارەیەوە بە هەماهەنگیی لەگەڵ ئەنجوومەنی دادوەری ڕەشنووسێک ئامادە دەکەن، دوای شەش مانگ لەسەر پەسەندکردنی هەموارەکە پێشکەشی پەرلەمانی دەکەن.