مووچەی خانەنشینانی پلەتایبەت هاوتای عێراق دەکرێت

ئاڤا نیوز 

بڕیارە ئەم هەفتەیە تیمێکی تایبەت لە وەزارەتی دارایی و ئابووریی هەرێمی کوردستان سەردانی بەغدا بکات و پرسی هاوتاکردنی مووچەی خانەنشینانی پلەتایبەت و خانەنشینانی سەربازی چارەسەر بکات.

وێنە گەورەکە: نزیکەی 10 هەزار خانەنشینی مەدەنی هەرچەندە مووچەیان هاوتاکراوە، بەڵام کێشەیان هەیە و 300 بۆ 400 هەزار کەمتر لە مافی خۆیان وەردەگرن، مووچەی خانەنشینانی پلەتایبەت کە ژمارەیان دوو هەزار مووچەخۆر دەبێت لەگەڵ خانەنشینانی سەربازی هێشتا هاوتانەکراوە. 

لێدوانی فەرمی: هونەر جەمال، گوتەبێژی وەزارەتی دارایی و ئابووری بە ئاڤا نیوزی ڕاگەیاند: ئێمە سەرەتا مەبەستمان بوو ئەوانەی مووچەیان کەمە بەزووترین کات سوومەندبن لە هاوتاکردنی مووچە لەگەڵ عێراق، بۆیە پەلەمان کرد و لیستێکمان نارد، لە مانگی هەشتەوە بەشێک لە خانەنشیان مووچەیان بە هاوتاکراوی وەرگرت".

ئەوەی پێویستە بیزانیت: لیژنەیەک بۆ هاوتاکردنی مووچەی خانەنشینانی پلەتایبەت و خانەنشینانی سەربازی پێکهێناوە و ئەم هەفتەیە سەردانی بەغدا دەکات. گوتەبێژی وەزارەتی دارایی دەڵێت: "لە ئایندەیەکی نزیکدا کێشەی ئەوانیش چارەسەر دەکرێت و مووچەیان هاوتای عێراق دەکرێت".

باکگراوند: خانەنشینانی مەدەنی ژمارەیان 149 هەزار و 687 کەسە و مووچەی مانگی هەشتیان بە هاوتاکراوی وەرگرت. خانەنشینانی سەربازیش کە ژمارەیان 88 هەزار و 490 کەسە تاوەکو ئیستا مووچەیان هاوتانەکراوە.