دانیشتنی دادگەی فیدراڵی لەبارەی هەڵبژاردنی پەرلەمانی کوردستان دەستیپێکرد

ئاڤا نیوز

 

کەمێک پێش ئێستا؛ دانیشتنی دادگەی فیدراڵی بۆ بڕیاردان لەبارەی یاسای هەڵبژاردنی پەرلەمانی کوردستان دەستیپێکرد. 

 

بۆچی گرنگە: هەرێمی کوردستان چاوەڕێی بڕیاری دادگەی فیدراڵی دەکات بۆ ئەنجامدانی هەڵبژاردنی پەرلەمانی کوردستان، تاوەکو ئێستا بەهۆیەوە دووجار وادەی هەڵبژاردن دواخراوە، لە ئەگەری یەکلاکردنەوەی دۆسیەکە هەرێمی کوردستان وادەیەک بۆ هەڵبژاردن دیاری دەکات. 

 

ئەوەی پێویستە بیزانیت: دادگەی فیدراڵی عێراق بۆ یازدەمین جار لەبارەی یاسای هەڵبژاردنی پەرلەمانی کوردستان دادەنیشێت، لەکاتێکدا چواردە جار دانیشتن بۆ ئەم دۆسیەیە دواخراوە. 

 

زانیاریی تایبەت: هەرێمی کوردستان بڕیاری داوە چیدیکە چاوەڕێی بڕیاری دادگەی فیدراڵی نەکات، لە کۆبوونەوەى 13-02-2024 نێچیرڤان بارزانى و سەرۆکایەتیی دادگەى پێداچوونەوەى هەرێمی كوردستان، داوای لە سەرۆکایەتیى دادگەکە کردووە، ئه‌گەر 18ـى ئەم مانگە دادگەى فیدراڵى بابەتى سکاڵاکەى یاساى هەڵبژاردنى پەرلەمانى کوردستان دوابخات، کاری ڕژد بۆ دۆزینەوەى دەرچەیەکى یاسایی بۆ پرسی هه‌ڵبژاردن بکەن. 

 

باکگراوند: زیاد جەبار، سەرۆکی فراکسیۆنی یەکێتی لە خولی پێنجەمی پەرلەمانی کوردستان و ئامانج نەجیب شەمعوون، ئەندامى کریستیانەکان لە ئەنجوومەنى پارێزگاى سلێمانى سکاڵایان لەدژی پێنج ماددەی یاسای هەڵبژاردنی پەرلەمانی کوردستان تۆمارکردووە، دانیشتنەکەی دادگەی فیدراڵی بۆ بڕیاردان لەم سکاڵایە دەبێت.