باڵەخانەی دادگای سلێمانی دەدرێت بە بەرپرسێکی یەکێتی و دەیکات بە شووقە و بازاڕ

ئاڤا نیوز 

 

دوای فرۆشتنی دەیان باڵەخانەی حکومی، یەکێتی باڵەخانەی دادگای سلێمانی تەخت دەکات، زەوییەكەی دەدات بە بەرپرسێک و دەیكات بە یەکەی نیشتەجێبوون و بازاڕ.

 

وێنە گەورەکە: دوای کۆنگرەی چوار و پێنجی یەکێتی، دەیان باڵەخانە و شوێنی گشتی کە موڵکی حکومەت بوون لەلایەن یەکێتییەوە یان بۆ پڕۆژەی بازرگانی فرۆشراون، یان بە هاوبەشی لەگەڵ سەرمایەداران پرۆژەی بازرگانییان لەسەر دروست کردوون.

 

دیمەنی باڵەخانەی دادگای سلێمانی

 

زانیاریی بەدەستهاتوو: بەپێی ئەو زانیارییانەی دەست ئاڤا نیوز كەوتوون، باڵەخانەی دادگای سلێمانی كە دەكەوێتە دەروازەی شارەكە، بەبڕیارێک دراوە بە بازرگانێک كە هاوبەشە لەگەڵ بەرپرسێكی باڵای یەكێتی.

 
لێدوانی فەرمی: د. كاروان حەمەساڵح، ئابووریناس و چاودێری سیاسی، بە ئاڤا نیوزی ڕاگەیاند: زەوی دادگای سلێمانی بەخشراوە بە بازرگانێک و دەكرێت بە یەکەی نیشتەجێبوون و بازاڕی هاوچەرخ.

 

لەلایەكی دیكەوە: ئەو چاودێرە سیاسییە بەدواداچوونی كردووە و ئاشكرای دەكات، باڵەخانەیەکی نوێ بۆ دادگای سلێمانی لە شوێنی وەستانی ئۆتۆمبێلی بەڕێوەبەرایەتیی هاتووچۆ لە تاسڵوجە دروست دەكرێتەوە.

 

قوڵتر: ئاڤا نیوز هەوڵیدا لایەنی بەرامەبەر کە دادگای سلێمانی و وەزارەتی داد بدوێنێت لەبارەی ئەو بابەتەوە، بەڵام کەسیان ئامادە نەبوون قسە بکەن. 

 

ئەوەش بزانە: ئەو شوێنەی بڕیارە دادگای سلێمانی بۆ بگوازرێتەوە ژمارەیەكی زۆر كارگەی شیش و چیمەنتۆی لێیە، بەهۆی نالەباری ژینگەکەی هۆشداریی دەدرێت كە زیانی زۆری بۆ ئەو سەدان كەسە دەبێت كە ڕۆژانە سەردانی دادگاكە دەكەن.

 

باکگراوند: دادگای سلێمانی دەکەوێتە سەر نزیک یەکتربڕی سەرچنار و شەقامی سەرەکی سلێمانی – کەرکووک، ڕۆژانە سەدان هاونيشتمانى بۆ ڕاییکردنی مامەڵەکانیان سەردانی ئەو دادگایە دەکەن،  ڕووبەرەکەشی بە دوو دۆنم دەخەمڵێندرێت.