ئەنجوومەنی وەزیران بەهەمیشەییکردنی فەرمانبەرانی گرێبەستی پەسەند کرد

ئاڤا نیوز

 

ئەمڕۆ چوارشەممە بە سەرپەرشتی سەرۆکوەزیران مەسرور بارزانی ئەنجومەنی وەزیرانی هەرێمی کوردستان کۆبووەوە و  بە هەمیشەییکردنی فەرمانبەرانی گرێبەست پەسەند کرا.

 

وێنە گەورەکە: ئەمڕۆ ئەنجوومەنی وەزیرانی حکومەتی هەرێمی کوردستان بۆ گفتوگۆکردن لەسەر دۆسیەی 'فەرمانبەرانی گرێبەست، دامەزراندنی سێ یەکەمەکانی زانکۆ و پەیمانگاکانی هەرێمی کوردستان، هەڵگرانی بڕوانامە باڵاکان و ئەوانەی کە یاسای پلەبەندی خاوەن پیشەی تەندروستی و پزیشکی دەیانگرێتەوە' کۆبووەوە.

 

زانیاریی زیاتر: ئەنجومەنی وەزیران دوای گفتوگۆ و ڕاگۆڕینەوە، بە شێوەیەکی مەبدەئی بابەتی بەهەمیشەییكردنی فەرمانبەرانی گرێبەستی پەسەند کرد بە هەمان ئەو مەرج و میکانیزم و ڕێکارانەی کە حکومەتی فیدڕاڵ لەمبارەیەوە پەیڕەویان دەکات و بەگوێرەی پێداویستی و تایبەتمەندیی دامەزراوەکانی هەرێمی کوردستان. 

 

ئەوەی پێویستە بیزانیت: وەزارەتی دارایی و ئابووری و ئەنجوومەنی گشتی ڕاژەی هەرێمی کوردستان ڕاسپێردران کە ڕێکاریی پێویست بگرنەبەر بە هەماهەنگی لەگەڵ وەزارەتی دارایی عێراقی فیدراڵ و لە چوارچێوەی هەمان تەرخانکراوی ئێستای مووچەی فەرمانبەرانی گرێبەست کە لە لایەن وەزارەتی دارایی عێراق مانگانە خەرج دەکرێت.

 

ئەمەش بزانە: ئەنجوومەنی وەزیرانی حکومەتی هەرێمی کوردستان داوا لە حکومەتی فیدراڵ دەکات ڕەزامەندی لەسەر بڕیاری بەهەمیشەییکردنی فەرمانبەرانی گرێبەست بدات.

 

باکگراوند: ژمارەی فەرمانبەرانی گرێبەست نزیکەی 30 هەزار فەرمانبەر دەبێت، هاوکات نزیکەی 14 هەزاریان لەسەر میلاکی وەزارەتی شارەوانی و گيشتوگوزارن.