ئەندامێکی ئەنجوومەنی پارێزگای بەغدا لە حیزبەکەی حەلبووسی لە پۆستەکەی دووردەخرێتەوە

ئاڤا نیوز

 

کێبەرکێی سوننەکان لە ناکۆکی سیاسییەوە بۆ شەڕێکی یاسایی گۆڕاوە، لەو چوارچێوەیەشدا سەرۆکی ئەنجوومەنی پارێزگای بەغدا لە پشکی هاوپەیمانی عەزم بەهۆی ئامادەنەبوون لە شەش دانیشتندا، کۆتایی بە ئەندامییەتی ئەندامێکی ئەنجوومەنەکە لە حیزبی تەقەدووم هێنا.

 

وێنە گەورەکە: بەگوێرەی یاسای ئەنجوومەنی پارێزگاکان ئەگەر ئەندامێکی ئەنجوومەن لە چوار دانیشتنی یەک لەدوای یەک ئامادەنەبێت، یان لە یەک لەسەر چواری دانیشتنەکانی ئەنجوومەن لە چوار مانگدا بەبێ هۆکار ئامادەنەبێت، بەدەستلەکارکێشاوە دادەنرێت.

 

ڕاگەیێنراوی فەرمی: عەممار قەیسی، سەرۆکی ئەنجوومەنی پارێزگای بەغدا لە نوسراوێکدا ئاماژەی بەوەکردوە بەهۆی ئامادەنەبوونی لە شەش دانیشتن لە چوار مانگدا، بڕیاریداوە بە کۆتاییهێنان بە ئەندامییەتی عەممار حەمدانی ئەندامی ئەنجوومەنەکە لە حیزبی تەقەدومی محەممەد حەلبوسی، سەرۆکی لەکاردوورخراوەی پەرلەمان.

 

ئەوەی پێویستە بیزانیت: لە چەند ڕۆژی ڕابردودا عەممار حەمدانی سەرۆکی ئەنجوومەنی پارێزگای بەغدای بە گەندەڵی تۆمەتبارکردبوو و لەو چوارچێوەیەدا واژۆی بۆ لابردنی لەپۆستەکەی، پێشکەش بە جێگری سەرۆکی ئەنجوومەنی پارێزگای بەغدا کردبوو.