عێراق مووچە بۆ زیاتر لە ملیۆنێک خێزان دەبڕێتەوە

ئاڤا نیوز 

 

ڕاوێژکارێکی سەرۆکوەزیرانی عێراق ئاشکرای دەکات لە سەرەتای ساڵی داهاتوودا، ملیۆنێک و 200 هەزار خێزان لە تۆڕی چاودێری کۆمەڵایەتی تۆماردەکرێن و مووچەیان بۆ خەرج دەکرێت.

 

وێنە گەورەکە: بەگوێرەی ئامارەکانی وەزارەتی کار و کاروباری کۆمەڵایەتی عێراق، ئێستا 7 ملیۆن و 600 هەزار کەس لە چوارچێوەی تۆڕی چاودێری کۆمەڵایەتی مووچە لە دەوڵەت وەردەگرن، خەرجی ساڵانەی وەزارەتەکەش ساڵانە زیاتر لە 6 ترلیۆن دینارە.

 

لێدوانی فەرمی: سەنا مووسەوی، ڕاوێژکاری سەرۆکوەزیرانی عێراق بۆ کاروباری کۆمەڵایەتی ڕایگەیاند، پێداویستییەکان بۆ تۆمارکردنی ملیۆن و 200 هەزار خێزان لە تۆڕی چاودێری کۆمەڵایەتی تەواوبوون، سەرەتای ساڵی 2025ش مووچەکانیان بۆ خەرج دەکرێت.

 

ئەوەی پێویستە بیزانیت: ماوەی 10 ساڵە، 13 هەزار و 120 خاوەن پێداویستی تایبەتی هەرێمی کوردستان لیژنەیان بۆ پێکهێنراوە و چاوەڕوانن مووچەیان بۆ ببڕێتەوە، وەزارەتی کار لەگەڵ ئەو 76 هەزار کەسەی دیکە کردوویەتی بە یەک پاکێج و ڕادەستی بەغدای کردووە، بۆ ئەوەی هەم مووچەیان بۆ ببڕێتەوە هەم هاوتای عێراق بکرێن.