كۆمیسیۆن مۆڵەتی سێ ڕۆژ بە بەربژێران دەدات

ئاڤا نیوز

 

لە نووسینگەكانی كۆمیسیۆنی باڵای سەربەخۆی هەڵبژاردنەكانی عێراق ژمارەیەك سەرپێچی بانگەشەی هەڵبژاردن تۆمار كراون و مۆڵەتی سێ ڕۆژ بە بەربژێرەكان دەدرێت و دوای ئەوە سزای دارایی دەدرێن، بەپێی بەدواداچوونی ئاڤا نیوز تەنیا لە سنووری پارێزگای سلێمانی حاڵەتی دڕاندنی پۆستەر هەبووە.

 

وێنە گەورەكە: ڕۆژی 25-9-2024 بانگەشەی هەڵبژاردنی پەرلەمانی كوردستان دەستی پێكرد و تاوەكو 15-10-2024 بەردەوام دەبێت.

 

لێدوانی فەرمی: مەڕوان محەممەد، بەرپرسی نووسینگەی هەولێری كۆمیسیۆن بە ئاڤا نیوزی ڕاگەیاند: لە سنووری پارێزگای هەولێر زیاتر لە 10 سەرپێچیی تۆمار كراون و سەرجەم سەرپێچییەكان بریتین لە دانانی پۆستەر و وێنە لەو شوێنانەی كە بەپێی ڕێنمایی كۆمیسیۆن نابێت پۆستەر و وێنەیان لێدابنرێت كە زۆرینەی شوێنەكان باخچەی نێوان شەقامەكانن.

 

لەلایەكی دیكەوە: خالید عەباس، بەرپرسی نووسینگەی كۆمیسیۆنی دهۆك بە ئاڤا نیوزی ڕاگەیاند: لە سێ ڕۆژی بانگەشەدا ژمارەیەكی زۆر سەرپێچی تۆمار كراوە و بەربژێرەكان ئاگادار كراونەتەوە كە بە زووترین كات وێنە و پۆستەرەكانیان لەو شوێنانە لاببەن كە قەدەغەن، مۆڵەتی سێ ڕۆژیان پێ دراوە و دەبێت لای ببەن، بەپێچەوانەوە سزای دارایی دەدرێن.

 

ئەوەش بزانە: بەپێی گوتەی بەرپرسانی هەردوو نووسینگەی دهۆك و هەولێری كۆمیسیۆن لە سنووری ئەو دوو پارێزگایە هیچ سكاڵایەك سەبارەت بە دڕاندنی پۆستەر و وێنە لەلایەن هیچ بەربژێرێكەوە تۆمار نەكراوە، بەپێی زانیارییەكانی ئاڤا نیوز تەنیا لە سنووری پارێزگای سلێمانی چەند حاڵەتێكی دڕاندنی پۆستەر و وێنە هەبووە.

 

زانیاریی تایبەت: بەپێی زانیارییەكانی ئاڤا نیوز، لە سێ ڕۆژی ڕابردوودا لە سنووری پارێزگای سلێمانی پۆستەری ژمارەیەك بەربژێری پارتی دڕێنراوە و تاوەكو ئێستا نازانرێت كێ ئەم كارەی كردووە.

 

بۆچوونی لایەنی بەرامبەر: مەرد عەلی، بەربژێری پارتی لە بازنەی سلێمانی، یەكێكە لەو بەربژێرانەی كە چەند پۆستەرێكی دڕێنراوە ڕایگەیاند: هەر جارێك پۆستەرێكم بدڕێنن دانەیەكی گەورەتر لە شوێنی دادەنێم.

 

ئەوەی پێویستە بیزانیت: بۆ وەرگرتنی زانیاریی زیاتر، ئاڤا نیوز چەند جارێك پەیوەندیی بە ئامانج عەزیز، بەرپرسی نووسینگەی سلێمانی كۆمیسیۆن كرد، بەڵام وەڵامی پەیوەندییەكانی نەدایەوە.