لە سێ ڕۆژی بانگەشەدا 12 سەرپێچی تۆمارکراون

ئاڤا نیوز

 

ماوەی سێ ڕۆژە بانگەشەی هەڵبژاردن دەستیپێکردووە، تاکو ئێستا 12 سەرپێچی لە سێ بازنەی هەڵبژاردن تۆمارکراون و پێچەوانەی ڕێنماییەکانی کۆمسیۆنی هەڵبژاردنەکان ڕەفتار کراوە، دوای لێکۆڵینەوە سزاکەیان دیاری دەکرێت.

 

وێنە گەورەکە: ڕۆژی 14-09-2024 کۆمسیۆنی هەڵبژاردنەکانی عێراق 15 ڕێنمایی تایبەت بە بانگەشەی هەڵبژاردنی بڵاوکردەوە، هەر لایەنێک سەرپێچی ئەو ڕێنماییانە بکات، سزای دارایی دەدرێت لەو بڕەی کە وەک دڵنیایی (تەئمینات) لەلای کۆمیسیۆن دانراوە، تاوەکو دوورخستنەوەی ئەو لایەنەی کە سەرپێچیکارە.

 

لێدوانی فەرمی: نەبەرد عومەر، بەرپرسی دەستەی هەڵبژاردنەكانی هەرێمی كوردستان لە کۆمیسیۆن بە ئاڤا نیوزی ڕاگەیاند، "لە ماوەی سێ ڕۆژدا 12 سکاڵا تۆمارکراون، پێنج لە هەولێر، پێنج لە سلێمانی و دوو لە دهۆک، بۆ ئەم مەبەستە لێکۆڵینەوە دەستیپێکردووە."

 

زانیاریی زیاتر: هیچ سکاڵایەک لە بازنەی هەڵەبجە تۆمارنەکراوە، زۆرینەی سکاڵاکانیش لەسەر لێکردنەوەی لۆگۆ و پۆستەری بەربژێرەکانە.

 

ئەوەی پێویستە بیزانیت: 22 ڕۆژی دیکە دەنگدانی گشتیی بۆ خولی شەشەمی پەرلەمانی کوردستان دەکرێت، هەزار و 191 بەربژێر کێبڕکێ لەسەر بەدەستهێنانی 100 کورسی دەکەن.