مۆڵەتی کارکردن بە هەزاران دەرچووی بەشەکانی دەرمانسازی و پزیشکانی ددان دەدرێت

ئاڤا نیوز 

حکومەتی هەرێمی کوردستان بڕیار دەدات هەر دەرچوویەکی زانکۆی پزیشکی دەرمانسازی پزیشکانی ددان، لە سێ ساڵ زیاتر ئەزموونی کاری  هەبێت مۆڵەتی کارکردنی پێبدرێت.

وێنە گەورەکە: بەپیی داتاکان لە تەمەنی کابینەی نۆیەمی حکومەتی هەرێمی کوردستان، واتە لە پێنج ساڵی ڕابردوودا نزیکەی 150 هەزار هەلی کار لە کەرتە جیاوازەکان ڕەخسێنراون.

لێدوانی فەرمی: د.سامان بەرزنجی، وەزیری تەندروستی حکومەتی هەرێمی کوردستان ڕایگەیاند، ئەمڕۆ یەکشەممە بە بڕیاری ژمارە 13148-ی حکومەت، هەموو دەرچووانی بەشی دەرمانسازی و پزیشکانی ددان، ئەوانەی  ئەزموونی کارکردنیان دوای دەرچوون لە سێ ساڵ زیاتر بێت، مۆڵەتی کارکردنیان پێدەدرێت و ئەمەش دەرفەتێکی زۆری کارکردن دەستەبەر دەکات و لە بەرژەوەندی گشتییە.

زانیاریی زیاتر: لە ماوەی نۆ ساڵدا، دەرچووانی ساڵانی 2015-2016 لە سەرجەم زانکۆکان، چوار هەزار و 413 دەرمانساز و پزیشکی ددانن، دوو هەزار و 174 پزیشکی ددانساز، دوو هەزار و 239 پزیشکی دەرمانساز، بەشێکی زۆریان خۆبەخشانە کاریان کردووە، بەشێکیان لە کەرتی تایبەت ڕاهێنانیان پێکراوە، هاوکات ئەوانەی ساڵی پار دەرچوون و ڕاهێنانیان نەکردووە لە ئایندە بەپێی پلانێک ئەوانیش ڕاهێنان دەبینن.

ئەوەی پێویستە بیزانیت: لە ڕابردوودا دەبوو پزیشكانی دەرمانساز و پزیشکانی ددان لە کەرتی گشتی دامەزراندنیان بۆ بکرێت، دوای چەند ساڵێک دەبوون بە هەڵگری ناونیشانی (پزیشكی پسپۆڕ) دوای ئەوە دەیانتوانی لە کەرتی تایبەت کاربکەن یان مۆڵەتی نۆرینگە و دەرمانخانە وەربگرن، ئەم بڕیارە ڕێگاکەیان بۆ کورت دەکاتەوە.