سوپای ئیسرائیل ئۆپەراسیۆنی زەمینی بۆ سەر حیزبوڵڵا دەستپێکرد

ئاڤا نیوز

 

سوپای ئیسرائێل هێرشی بۆ سەر خاکی لوبنان دەستپێکرد و هۆشداریش بە ئێران دەدات، لە ئەگەری دەستێوەردانی ڕاستەوخۆ زیان بە دامەزراوە ئەتۆمییەکانی ئەو وڵاتە دەگەیەنێت.

 

وێنە گەورەکە: ئەمڕۆ دووشەممە 30-09-2024، سوپای ئیسرائیل ئۆپەراسیۆنیکی سنوورداری زەمینی بۆ سەر حیزبوڵڵا بە درێژایی سنوورەکانی لوبنان دەستپێکرد.

 

ئەوەی لەبارەیەوە دەگوترێت: بەگوێرەی میدیاکانی ئیسرائیل، لە چەند ڕۆژی ڕابردوودا ئیسرائیل لە ڕێگەی نێوەندگیرانەوە پەیامی هەڕەشە ئامێزی ئاراستەی ئێران کردووە، کە لە ئەگەری دەستوەردانی ڕاستەوخۆی ئێران، زیان بە دامەزراوە ئەتۆمی و نەوتییەکانی ئەو وڵاتە دەگەیەنێت.

 

لەلایەکی دیکەوە: کۆشکی سپی پشتڕاستی دەکاتەوە کە هێزەکانی ئیسرائیل چالاکیی سنووردار لەناو خاکی لوبنان ئەنجام دەدەن، چالاکییەکە بەدرێژایی سنووری وڵاتەکە لەگەڵ لوبنان ئەنجام دەدرێت.

 

زانیاریی زیاتر: لای خۆیەوە بەریتانیا داوای ئاگربەست لە ئیسرائیل و حیزبوڵڵا دەکات و نایەوێت گرژییەکان زیاتر پەرە بسێنن.

 

باکگراوند: دوای هێرشەکانی ئیسرائیل بۆ سەر بەیرووت و بە ئامانج گرتنی حەسەن نەسروڵڵا، ڕۆژێک دوای بۆردوومانەکە حیزبوڵڵا کوشتنی سەرۆکەکەیانی پشتڕاستکردەوە و تەرمی نەسروڵڵا لە ژێر باڵەخانە ڕووخاوەکە دۆزرایەوە.