لێدوانی نوێ لە وەزارەتی دارایی عێراقەوە لەبارەی مووچەی مانگەکانی هەشت و نۆ

ئاڤا نیوز

 

پەرلەمانتارێک و سەرچاوەیەک لە وەزارەتی دارایی عێراق ڕایدەگەیێنن، کێشەی مووچەی مانگی هەشت لە بەغدا چاسەر کراوە و پارەکە دەنێردرێت، لەم ڕۆژانەش مووچەی مانگی نۆ خەرج دەکرێت.

وێنە گەورەکە: لەکاتێکدا ئێستا مانگی دەیە، تاوەکو ئێستا حکومەتی عێراق پارەی پێویستی بۆ مووچەی مانگی هەشت نەناردووە و حکومەتی هەرێمی کوردستان  243 ملیار دینار کورتهێنانی هەیە.

لێدوانە فەرمییەکان: سەرچاوەیەک لە وەزارەتی دارایی عێراق بە ئاڤا نیوزی گوت، "وەزارەتی دارایی هەرێمی کوردستان تێبینیی لەسەر ئەو بڕە پارەیە هەیە کە بەغدا بۆ مووچەی مانگی هەشت ناردوویەتی و دەڵێت کەمە، ئەم کێشەیە چارەسەر کراوە،  لەم ڕۆژانەش مووچەی مانگی نۆ دەنێردرێت."

هاوکات ئیخلاس دلێمی، ئەندامی لیژنەی دارایی لە پەرلەمانی عێراق بە ئاڤا نیوزی گوت، "وەزارەتی دارایی عێراق ڕەزامەندی دەربریوە لەسەر خەرجکردنی بڕی 243 ملیار دیناری کورتهێنانی مانگی هەشت و ئەمڕۆ یان سبەی پارەکە دەنێردرێت."

ئەوەی پێویستە بیزانیت: بەڕێوەبەری گشتیی ژمێرکاری وەزارەتی دارایی و ئابووریی هەرێمی کوردستان بۆ وەڵامدانەوەی چەند تێبینییەکی وەزارەتی دارایی عێراق لەبارەی پرسەکانی بایۆمەتری، پلەبەرزکردنەوەی فەرمانبەران و چەند تێبینییەکی دیکە لە دوێنێوە لە بەغدایە.

لەلایەکی دیکەوە: ڕێباز حەملان، یاریدەدەری سەرۆکوەزیرانی هەرێمی کوردستان ئەمڕۆ سێشەممە لە لێدوانێکی ڕۆژنامەوانیدا ڕایگەیاند: "بڕیارە ئەمڕۆ وەزارەتی دارایی عێراق تەواوکاری پارەی مووچەی مانگی هەشت بنێرێت، ئەگەر پارەکە نەگات لە ماوەی دوو ڕۆژی داهاتوودا حکومەتی هەرێمی کوردستان بڕیار لەبارەی دابەشکردنی مووچە دەدات".