تەنیا لە 20 ڕۆژدا نرخی ئۆنسەیەک زێڕ 356 دۆلار بەرزبووەتەوە

ئاڤا نیوز

 

گۆڕانکارییەکان لە نرخی زێڕدا بەردەوامە و بەشێوەیەکی چاوەڕواننەکراو نرخەکەی بەرزبووەوە، ئەندامێکی سەندیکای زێڕنگەرانی هەولێریش دەڵێت، "تەنیا لە ماوەی 20 ڕۆژدا ئۆنسەیەک زێڕ 356 دۆلار لە نرخەکەی بەرزبووەتەوە".

 

لێدوانی فەرمی: سەفین وەرتی، ئەندامی سەندیکای زێڕنگەرانی هەولێر بە ئاڤا میدیای ڕاگەیاند: ڕۆژی هەینی هەر ئۆنسەیەک زێڕ 200 دۆلار لە نرخەکەی دابەزی. ڕۆژانی شەممە و یەکشەممەش بەهۆی داخرانی بۆرسەوە نرخی زێڕ جێگیر دەبێت، بەڵام ئەگەر گۆڕانکاری لە نرخی دۆلار ڕووی دا نرخی زێڕیش دەگۆڕێت.

 

ئەندامەکەی سەندیکای زێڕنگرانی هەولێر وتیشی: لە ڕۆژی 1-10-2025، تاوەکو ئەمڕۆ یەکشەممە، یەک ئۆنسە زێڕ 356 دۆلار و یەک مسقاڵ زێڕیش 87 هەزار دینار لە نرخەکەیان بەرزبووەتەوە.

 

زانیاریی زیاتر: نرخی زێڕ لە بازاڕەکاندا بەم شێوەیە:-

-یەک ئۆنسە زێڕ بە چوار هەزار و 252 دۆلارە.
-مسقاڵێک زێڕ عەیار 22 بە 916 هەزار دینارە.
-مسقاڵێک زێڕ عەیار 21 بە 875 هەزار دینارە.
-مسقاڵێک زێڕ عەیار 18 بە 750 هەزار دینارە.