بەشێکی دیکەی چەکی پارەی جووتیارانی هەولێر دابەش دەکرێت

ئاڤا نیوز

سایلۆی هەولێر جووتیارانی سنووری هەولێر ئاگادار دەکاتەوە، کە سبەی یەکشەممە چەکی پارەی جووتیاران بەشێوەی زنجیرە دابەش دەکرێت.

وێنە گەورەکە: ئەمساڵ هەرێمی کوردستان نزیکەی 400 هەزار تۆن گەنمی ڕادەستی بەغدا کردووە، لەو بڕەش زیاتر لە 120 هەزار تۆن گەنمی هی سنووری پارێزگای هەولێر بووە.

لێدوانی فەرمی: میران بەختیار، بەڕێوەبەری بازرگانی دانەوێڵەی هەولێر بە ئاڤای وت: ئەو جووتیارانەی لە زنجیرەی (1001) تا (1163) گەنمیان ڕادەستی سایلۆی هەولێر کردووە، ڕۆژی یەکشەممە 19-10-2025 چەکی پارەیان بەسەردا دابەش دەکرێت، دەتوانن لە بانکی TBI پارەکانیان وەربگرن.

بەڕێوەبەری بازرگانی دانەوێڵەی هەولێر ڕایگەیاند: بڕیاروایە پێش هەڵبژاردنی ئەنجوومەنی نوێنەرانی عێراق گوژمەیەکی دیکەی پارەی گەنمی جووتیاران ڕەوانەی هەرێمی کوردستان بکرێت، بەڵام هێشتا هیچ نووسراوێکی فەرمیمان لەمبارەیەوە بۆ نەهاتووە.

زانیاریی زیاتر: ئەو جووتیارانەی 50 تۆن گەنم، یان کەمتریان ڕادەستی سایلۆ کردبێت، ئەوا دەتوانن بۆ وەرگرتنی چەکی پارەکانیان سەردانی سایلۆی هەولێر بکەن، بەڵام ئەو جووتیارانەی زیاتر لە 50 تۆن گەنمیان ڕادەستی سایلۆ کردبێت، لە قۆناغەکانی دیکەی ناردنی پارە لەلایەن بەغداوە، چەکی پارەیان بەسەردا دابەش دەکرێت.

ئەوەی پێویستە بیزانیت: ئەمساڵ تەنیا لە سایلۆی هەولێر و کۆیە نزیکەی سێ هەزار و 900 جووتیار گەنمیان ڕادەست کردووە، کۆی گشتیی گەنمی وەرگیراو زیاتر لە 120 هەزار گەنم بووە.

ئەمەش بزانە: کۆی گشتیی پارەی گەنمی جووتیارانی سنووری هەولێر 97 ملیار دینارە، تاوەکو ئێستا 25 ملیار بە دوو قۆناغ وەرگیراوە.