ئەنجوومەنی وەزیرانی عێراق نووسراوی خەرجکردنی مووچەی مانگی هەشت دەردەکات

ئاڤا نیوز

بڕیارە سبەی یەکشەممە ئەنجوومەنی وەزیرانی عێراق نووسراوی خەرجکردنی مووچەی مانگی هەشتی مووچەخۆرانی کوردستان دەربکات، بەرپرسێکی کوردیش لە بەغدا دەڵێت، ئەم هەفتەیە پارەی مووچەی مانگی هەشت دەگات.

چیرۆکی سەرەکی: هەرچەندە سەرۆکوەزیرانی عێراق بەڵێنی خەرجکردنی مووچەی مانگی هەشتی مووچەخۆرانی کوردستانی دا، بەڵام زیاتر لە 10 ڕۆژ بەسەر بەڵێنەکە تێدەپەڕێت، تا ئێستا مووچە خەرج نەکراوە، چاوەڕوان دەکرێت ئەم هەفتەیە خەرج بکرێت.

زانیاریی بەدەستهاتوو: بەگوێرەی زانیارییەکانی ئاڤا کە لە بەرپرسێکی باڵای حکومەتی عێراق وەریگرتوون، بڕیارە سبەی یەکشەممە ئەنجوومەنی وەزیرانی عێراق نووسراوی خەرجکردنی مووچەی مانگی هەشت دەربکات و کۆپییەکی بۆ هەردوو وەزارەتی دارایی عێراق و هەرێمی کوردستان بنێرێت. پاشان وەزارەتی دارایی هەرێمی کوردستان بڕی 120 ملیار دینار لە داهاتی ناوخۆ، بە شێوەی کاش ڕادەستی لقی هەولێری بانکی ناوەندی عێراق دەکات.

هەنگاوی داهاتوو: بەدوای ئەم هەنگاوەدا، وەزارەتی دارایی عێراق دەست بە ڕێکارەکانی خەرجکردنی پارە دەکات کە چاوەڕوان دەکرێت دوو بۆ سێ ڕۆژ بخایەنێت. دوای تەواوبوونی ڕێکارەکان، نزیکەی 950 ملیار دینار دەخاتە سەر هەژماری وەزارەتی دارایی هەرێمی کوردستان لە لقی هەولێری بانکی ناوەندی.

لەلایەکی دیکەوە: بەرپرسێکی کورد لە بەغدا ڕایگەیاندووە،  چاوەڕوان دەکرێت ئەم هەفتەیە پارەی مووچە بگات.