سەرۆكی كۆمسیۆن: لە هەڵبژاردنی ئەمجارە ڕێژەی گزیکردن سفر دەبێت

ئاڤا نیوز 

 

لە كۆنفڕانسێكی ڕۆژنامەوانیدا سەرۆكی كۆمیسیۆنی باڵای سەربەخۆی هەڵبژاردنەكان ڕایگەیاند كە زیاتر لە 95%ـی ئامادەكارییەكان بۆ پرۆسەی هەڵبژاردنی پەرلەمانی كوردستان كراون و جەختیشی كردەوە كە ئەمجارە ڕێژەی گزیکردن سفر دەبێت.

 

وێنە گەورەكە: ڕۆژی 20-10-2024، هەڵبژاردنی پەرلەمانی كوردستان بەڕێوەدەچێت و هەرێمی كوردستان دابەشی سەر چوار بازنەی دەنگدان كراوە.

 

لێدوانی فەرمی: عومەر ئەحمەد، سەرۆكی كۆمیسیۆنی باڵای سەربەخۆی هەڵبژاردنەكان ڕایگەیاند: كۆمیسیۆن هەموو ئامادەكارییەكانی تەواو كردووە لەپێناو هەڵبژاردنێكی پاک و بێگەرد لە 20-10-2024، ئێستا ڕێژەی زیاتر لە 95% كارەكانمان تەواو كردووە و كاغەزەكانی دەنگدان گەیشتوونەتە نووسینگەكانی كۆمسیۆن لە پارێزگاكانی هەرێمی كوردستان.

 

لەلایەكی دیكەوە: سەرۆكی كۆمیسیۆن ئاماژە بە ئەوەش دا كە هەموو ئامێرە ئەلیكترۆنییەكانی ڕۆژی دەنگدان ئامادە كراون و بەسەر بنكەكانی دەنگداندا دابەش كراون، هاوكات داوەتنامە ئاراستەی سەرجەم چاودێران و كونسوڵخانە و ڕێكخراوەكان كراون و تاوەكو ئێستا نۆ كونسوڵخانە ئامادەیی خۆیان دەربڕیوە چاودێریی پرۆسەكە بكەن.

 

زانیاریی زیاتر: زیاتر لە 41 هەزار كارمەندی كۆمسیۆنی باڵای سەربەخۆی هەڵبژاردنەكان پرۆسەكە بەڕێوە دەبەن و بەپێی گوتەی سەرۆكی كۆمسیۆن ئەم هەڵبژاردنە لە هەڵبژاردنەكانی ڕابردوو جیاوازە چونكە كارتی بایۆمەتریی و چەندین جۆر ئامێری ئەلیكترۆنی و كامێرای چاودێریی پێشكەوتوو  لە پرۆسەكە بەكاردێن و ڕێژەی گزیکردن لەم هەڵبژاردنە سفر دەبێت.