گۆڕان بەفەرمی بەسەر دوو بەرە دابەش دەبێت

ئاڤا نیوز

دوو باڵەکەی بزووتنەوەی گۆڕان لە گفتوگۆی نێوانیاندا نەگەیشتوونەتە هیچ ئەنجامێک، لە دوو ڕاگەیێنراوی جیادا لە دوو شوێنی جیاواز بارەگای سەرەکی بزووتنەوەکەیان کردووەتەوە.

 

وێنە گەورەکە: کاریگەریی ناکۆکی نێو دوو باڵەکەی  بزووتنەوەی گۆڕان گەیشتە ڕادەی جیاکردنەوەی بارەگای سەرەکی لە نێوان کوڕانی نەوشیروان مستەفا و باڵی عومەری سەید عەلی، دوای کردنەوەی بارەگایەکی نوێ لەلایەن باڵی عومەری سەید عەلی لە گەڕەکێکی شاری سلێمانی، دەرگای گردی زەرگەتە دوای شەش ڕۆژ لە داخستنی لەلایەن کوڕانی نەوشیروان مستەفا کرایەوە.

 

ڕاگەیێنراوی فەرمی: پەڕەی فەرمی بزووتنەوەی گۆڕان ئاماژە بە کردنەوەی مەکۆیەکی نوێ لە گەڕەکی کوردساتی شاری سلێمانی وەک مەکۆی سەرەکی بزووتنەوەکە دەکات، لەوێشەوە بانگەشەی بزووتنەوەکە بۆ هەڵبژاردنی پەرلەمانی کوردستان دەستپێدەکات.

 

لەلایەکی دیکەوە: میدیای فەرمی کوڕانی نەوشیروان مستەفا ڕاگەیێنراوێکیان بە ناوی جڤاتی نیشتمانی هەڵبژێردراو بڵاوکردووەتەوە  و تێیدا ئاماژە بەوە دراوە، "دوای ڕێگری لە پشێوی و هێوربوونەوەی دۆخەکە، بڕیاردرا بە کردنەوەی  مەکۆی سەرەکی بزووتنەوەی گۆڕان و گردی زەرگەتە لەسەر بنەمای دەستووری نێوخۆیی بزووتنەوەی گۆڕان."

 

زانیاریی تایبەت: سەرچاوەیەک لە بزووتنەوەی گۆڕان بە ئاڤا نیوزی ڕاگەیاند، "لە گفتوگۆی نێوانیاندا دوو بەرەکە لەسەر هیچ بنەمایەک نەگەیشتوونەتە ڕێککەوتن، بۆیە ئەم کاردانەوەیەی لێکەوتەوە."

 

باکگراوند: ڕۆژی 18-09-2024، بە نووسراوێکی عومەری سەید عەلی، دانا ئەحمەد مەجید کرایە ڕێکخەری گشتیی بزووتنەوەی گۆڕان، ئەمەش کێشەکانی باڵی  "نێوان کوڕانی نەوشیروان مستەفا و عومەری سەید عەلی" قووڵتر کردەوە.

دوای دەستبەکاربوونیشی، ڕۆژی 30-9-2024، دانا ئەحمەد مەجید سیاسەت و بەرنامە و پلانی بزووتنەوەی گۆڕانی ئاشكراکرد و ڕایگەیاند، لەمەودوا دەبنە هێزێکی ئۆپۆزیسیۆن تاوەکو زۆرینەی پەرلەمان بەدەستدەهێنن.