لە عێراق ژمارەیەک کێڵگەی ڕووەکی ماددەی هۆشبەر لەنێو دەبرێن

ئاڤا نیوز

 

لە دوو پارێزگا هێزەکانی سەر بە دەزگای ئاسایشی نیشتمانیی عێراق ژمارەیەک کێڵگەی ڕووەکی بەرهەمهێنانی ماددەی هۆشبەر لەناو دەبەن.

 

وێنە گەورەکە: عێراق بووەتە ناوەندێک بۆ گواستنەوە و بەرهەمهێنانی ماددەی هۆشبەر و کارتێکەرە دەروونییەکان، تاوەکو ئێستا چەندین بازرگانی نێوخۆیی و نێودەوڵەتی دەستگیرکراون و دەستیش بەسەر چەندین کارگەی بەرهەمهێنانی ماددەی هۆشەبەردا گیراوە. 

 

ڕاگەیێنراوی فەرمی: دەزگای ئاسایشی نیشتمانیی عێراق ڕایگەیاند: هێزەکانمان لە پارێزگاکانی بەغدا و دیالە، بە پشتبەستن بە زانیارییە هەواڵگرییە پشتڕاستکراوەکان و دوای بەدواداچوونی وردی مەیدانی، توانیویانە دەست بەسەر شەش کێڵگەی ڕووەکی ماددەی هۆشبەر لە جۆری "داتورا"دا بگرن.

 

زانیاریی زیاتر: هەڵمەتەکە لە ناوچەکانی مەدائین، ئەلبووعەیسە لە بەغدای پایتەخت و بەلدروز لە پارێزگای دیالە کرا، لە ئەنجامدا دەستبەسەر دوو هەزار و 305 ڕووەکی هۆشبەردا گیرا و هەر لەوێش بە هاوکاری بەشی کشتوکاڵی دۆرا و مەدائین و بەلەدروز لەنێو بران.

 

ئەوەی پێویستە بیزانیت: بە گوتەی میقداد میری، گوتەبێژی وەزارەتی ناوخۆی عێراق ڕێژەی دەستبەسەرداگرتنی ماددەی هۆشبەر لەمساڵدا لە سەرتاسەری عێراق 210% بەرزبووەتەوە، لە دوو ساڵی ڕابردووشدا 569 تۆڕی جیاواز دەستگیرکراون.